Minister encarga cu Turismo, Salubridad Publico y Deporte, Sr. Dangui Oduber a tene su prome reunion cu CEO di AAA, Sr. James Fazio. E reunion a bay den un esfera hopi ameno y positivo. E mandatario y e CEO di AAA a discuti hopi punto di interes pa cu AAA y a haya un presentacion chikito di e CEO di AAA tocante e proyecto pa expansion di nos aeropuerto cual ta hiba e titulo di Gateway 2030.
Tambe e CEO di AAA a duna un splicacion amplio na e mandatario tocante e plan pa inverti den nos aeropuerto pa converti esaki den e miho aeropuerto den e region di Caribe.
Durante e reunion aki a trata tambe hopi otro tema nan importante y tambe e mandatario a comparti su vision cu e CEO di AAA.
E Proyecto Gateway 2030 ta un proyecto sumamente grandi pa pais Aruba cu inversion nan di miyones cu sigur lo contribui tambe na e economia local. Minister Dangui Oduber a haya un impresion hopi positivo riba e Proyecto Gateway 2030 di AAA y tambe a keda satisfecho cu e maneho di e CEO di AAA.