Minister Chris Romero a hasi su prome bishita oficial na ANSA N.V

0

Minister Romero a continua cu su bishitanan na e diferente departamentonan cu ta cay bou di su Ministerionan. A toca turno e biaha aki na ANSA N.V, caminda Minister hunto cu su conseheronan a wordo ricibi pa e Director, sr. Nilky Kock, kende a duna nan un recorido den e instalacionan di e departamento, pero tambe a introduci e empleadonan.
Minister a keda bastante impresiona cu e presentacion amplio cu a haya for di e managers di ANSA N.V, unda cu a splica specificamente kiko e funcion di cada unit den e departamento ta.
Maske cu nos tur ta mira cu na aeropuerto tin simplemente un toren, pero hopi biaha nos ta ignora e gran cantidad di trabou cu mester keda hasi diariamente pa esaki por funciona di un manera optimal y responsabel.
E maneho di un espacio aereo ta algo sumamente delicado y ta rekeri di hopi exactitud y sentido di responsabilidad. Y ta pa es motibo cu Minister Romero a keda hopi satisfecho di mira cu ANSA N.V ta posiciona actualmente como un di e mihor departamentonan di maneho aereo den nos region.
Cu e bishita aki, Minister a keda mihor informa, y na un manera mas detaya, di e kico e maneho di ANSA N.V ta encera, y pakico e ta asina importante pa nos pais.

Comments

comments