Saba: Minister di enseñansa, kultura i siensia, Jet Bussemaker, a bishitá Saba riba djamars i djárason e siman aki i a ekspresá satisfakshon ku e progreso ku ta tumando lugá den enseñansa.
Riba djárason, akompañá pa diputado di enseñansa Bruce Zagers, Representante di Reino Gilbert Isabella i un delegashon di empleadonan públiko di Den Haag i di Hulanda Karibense, Bussemaker a risibí un rekorido di e sekshon tékniko di Saba Comprehensive School na Cove Bay, Saba Comprehensive School i Sacred Heart School na St. Johns. E Minister a bisa ku tabata importante pa e mes mira e progreso riba tur nivel di enseñansa na Saba.
Un punto importante di interes pa e minister tabata pa mira kon e partnernan den enseñansa na Saba ta traha huntu ku stakeholdernan di e otro islanan. E di dos agènda di enseñansa a keda firmá na Sint Eustatius pa ministerio di OCW, e 3 entidatnan públiko i institutonan relevante di enseñansa na e tres islanan ku e ophetivo prinsipal pa reforsá e koperashon.
“Traha huntu pa un kousa komun ta e mihó manera pa reforsá nos sistema di enseñansa i nos komunidat. Bon edukashon ta e fundeshi mas sólido pa nos komunidatnan.
Pasobra loke ta sosodé den e klasnan ta loke ta sosodé den sobra di komunidat tambe. Esaki ta e motibu tambe ku ta importante pa nos muchanan siña mas ku solamente abilidatnan práktiko.
Dor di firma e di dos agènda di enseñansa e tres islanan ta komprometé nan mes pa hiba enseñansa na e siguiente nivel.’
Diputado di enseñansa Bruce Zagers a gradesí Minister Bussemaker pa e bon koperashon ku ta eksistí entre e islanan i e Ministerio di OCW. Ela splika tambe ku otro ministerionan por siña di e aserkamentu aki.
Riba djamars e Minister a topa tambe ku representantenan Body Mind & Spirit (BMS) kaminda e diskushon sentral tabata riba derechonan humano di LGBT. Bussemaker i su delegashon lo kontinuá nan bishita di trabou pa Boneiru kaminda lo hiba kombersashon ku entre otro partnernan den enseñansa.