Minister Besaril a cera conoci cu directiva di Genootschap Nederland Aruba

0

DEN HAAG  – Durante un encuentro na Cas di Aruba Minister Plenipotenciario Guilfred Besaril a cera conoci cu e directiva di Genootschap Nederland Aruba (GNA).

Minister Besaril a haci un impresion grandi riba e directiva di GNA, cu su vision y plannan como Minister Plenipotenciario di Aruba na Hulanda. Principalmente riba e vision di Gobierno pa desaroya e asina yama “Blue Economy” cu ta concentra riba e lama rond di Aruba. E mandatario a bisa cu un ehempel di esaki ta duna servicio di reparacion, abastece y cambio di tripulacion na barconan chikito. Sr. Besaril a menciona cu Panama a bira grandi riba e tereno aki cu barconan grandi y cu Panama no tin espacio mas pa barconan chikito. ‘Y akinan ta unda Aruba por hunga un rol grandi. E lama rond di Aruba ta relativamente calmo pa por haci esaki. Tambe e diferencia den e temperatura di e awa por wordo usa pa energia alternativo. Mi trabao ta pa busca akin a Hulanda companianan cu ta interesa den inverti den e sector aki,’ asina sr. Besaril a bisa.

E mandatario a bisa tambe cu Gobierno di Aruba ta enfoca riba innovacion. E bentaha grandi ta cu no mester di hopi espacio, cu ta positivo pa Aruba miranda e grandura di e isla. Tambe esaki ta conserva e medio ambiente y naturalesa di e isla.

Den e encuentro a papia tambe di e situacion cu Venezuela y cu e mandatario no ta mira esaki como un problema, pero mas bien un situacion cu ta brinda oportunidad, manera expancion di e posibilidadnan di e sector primario na Aruba. ‘Asina por crea un pilar economico nobo y por yega na reduci importacion di fruta y berdura.

Minister Besaril a papia di su plannan pa cu Cas di Aruba, cu lo mester brinda mas servicio ainda na nos hendenan aki na Hulanda, sea nan ta studia, ta akinan pa motibonan medico of a scohe pa biba na Hulanda. Pa loke ta studiante sr. Besaril a bisa cu su meta ta pa hisa e porcentahe di studiantenan cu ta termina na studio cu exito.

Na final di e encuentro presidente di GNA Nico van Grieken a gradici Minister Besaril pa e oportunidad pa cera conoci cu e directive di GNA y a haci entrega di un ehemplar di e buki ‘Aruba, balans van 30 jaar status aparte’, cual buki GNA a publica na ocacion di nan 20 aña di existencia.

Comments

comments