Minister Besaril a bishita Conferencia Panama Invest

0

DEN HAAG – Minister Plenipotenciario Guillfred Besaril riba invitacion di Presidente di Panama Juan Carlos Varela a asisti na e Conferencia Panama Invest and Panama Fest den Okura hotel na Amsterdam. E mandatario a wordo acompaña pa Roy Hart di e departamento di “Economische Acquisitie” di Cas di Aruba.

E delegacion di Panama a consisti tambe di vice presidente di Panama Isabel Saint Malo, minister di Economia y Finanza di Panama Dulcidio de la Guardia y embahador di Panama na Hulanda Willys del Valle. Embahador di Reino na Panama, Dirk Janssen tabata un di e oradornan y a tene un discurso riba e posibilidadnan pa inversionistanan Hulandes na e pais Centro Americano. Head of Global Business Services di Philips Craig Gruchacs a elabora riba e ventahanan cu Panama ta brinda na compania manera Philips pa tin operacionnan for di Panama.

Minister De la Guardia a tene un presentacion riba e situacion di Panama; e aspecto macro economico di e pais cu enfasis riba e inversionnan cu Panama e realisa y loke tin proyecta riba diferente tereno manera infrastructura, sector financiero y turismo.
Presidente di Panama Juan Carlos Varela a clausura e programa oficial como keynote speaker unda e presidente a bai mas profundo riba e posicion di Panama den e region Centro Americano y e maneho di Panama pa crea un clima financiero y economico beneficioso y stabiel pa inversionsitanan, particularmente di empresanan Hulandes.

Pa Minister Besaril como representante di Aruba un evento asina ta brinda e oportunidad unico pa topa y papia cu hopi persona entre otro for di e mundo di comercio y asina amplia su network di contactonan cu te beneficioso y util pa Aruba.

Potretnan ta cortesia di Cas di Aruba.

Comments

comments