Durante conferencia di prensa di partido POR, parlamentario Marisol Lopez Tromp a papia riba influencianan a largo plazo riba nos economia. Parlamentario Lopez Tromp a menciona tres herment cu e minister di infrastructura tin pa stimula nos ecomomia.
Un herment cu Minister Sevinger tin pa por stimula nos economia ta e poder di por otorga tereno na un forma transparente y segun ley, pa asina por trece den comunidad e posibilidad pa ciudadano y of comerciantenan por construi cas, edificio y proyectonan. Esaki ta pone cu nan por acerca banconan pa haya hipoteca, contratistanan por haya trabou y otro ciudadanonan por haya trabounan directamente of indirectamente relaciona na construccion.
Tambe minister Sevinger tin e poder den su man pa construi careteranan. Pero kiko e mandatario aki ta haci? Dos cos: 1. E herment cu e tabatin pa por percura pa traha careteranan den un forma regular y anualmente pa ciudadanonan den bario y areanan residencial unda famianan ta biba y ta anhela pa drecha camindanan, e mandatario e elimina e Wegenfonds, esta e fondo pa caretera. Un fondo cu tabatin miyones di florin aproba door di Parlamento anualmente pa por drecha, mehora y asfalta careteranan tur rond di Aruba. Careteranan cu ta wordo paga cu bo placa, e placa di belasting cu ta placa di pueblo. Careteranan no ta regalo di Gobierno, careteranan ta bo derecho cu bo tin como pagado di belasting. Door di elimina e fondo di caretera minister Sevinger ta mustra cu esaki no ta su prioridad.
E di dos herment cu minister Sevinger tin pero cu e no ta uza, ta su propio departamentonan. E mandatario por duna permisonan di construccion pero e tin esaki tranca. DOW cu ta un departamento cu e mandatario por fortifica cu personal adecua ki ora cu e kier. E tin cu simplemente bai na e departamento y percura pa pone mas profesionalnan den funcion. Profesionalnan cu a solicita of cu ta trahando caba. Pero e mandatario ta pone prioridad na nombra un cantidad di persona djis pa sostenele den campaña of cana band’i dje den bario enbes di ta den e departamento haciendo nan trabou.
Asina e mandatario ta pone cu e departamentonan ta stanca a base di documentonan cu nan no por saca y e minister ta laga ciudadanonan warda lunanan y te hasta añanan caminda cu si e otorga esaki unabes cu e ta aproba, e ciudadanonan mes por bai traha nan cas y negoshi y asina e economia ta wordo stimula. Ta den minister Sevinger su man e hermentnan aki ta y ta e mes tin tur cos pega.
E di tres manera cu minister Sevinger tin e economia pega apesar di e hecho cu e minister a wordo taha, y no solamente taha pero cu tin investigacionnan andando riba e topico aki, ta e hecho cu e minister di infrastructura te awor aki ta firmando documentonan den un forma cu e sa di antemano cu no ta yudando e ciudadano cu ta bin cerca dje. Den otro articulo e parlamentario ta amplia riba esaki.