Siman pasa minister encarga cu Asuntonan Economico y Comunicacion, sr. Richard Arends, a haci su prome bishita oficial na Hulanda unda cu el a sigui estrecha e lasonan cu partnernan strategico di Aruba riba tereno comercial y economico. Despues di rehabilitacion di e refineria, como tambe fortificacion di nos turismo durante e ultimo añanan, Gabinete Mike Eman II ta sigui traha riba e pilar economico nobo basa riba tecnologia y conocemento. “Nos ta yama inversionistanan bon bini. Aruba ta e portal ideal pa haci negoshi y yega na un mercado mucho mas grandi,” e titular di Asuntonan Economico a declara.
“Cu e cinco areanan di oportunidad cu nos a identifica rond di nos isla lo wordo desaroya cu conocemento y experticio riba logistica, turismo, tecnologia y industrianan creativo brindando asina perspectivanan economico pa e añanan nos dilanti,” Minister Arends a splica. Durante su bishita na Hulanda Minister Arends a wordo compaña pa Minister Plenipotenciario na Den Haag y staff di Departamento di Adkisicion Economico di su Gabinete.
Na Hulanda e mandatario a hiba combersacionan cu e.o. Departamento di Asuntonan Exterior, Qredits, VNO-NCW, e asociacion di dunadornan di trabou Hulandes, como tambe varios partner asocia na Ondernemend Nederland. “Sigur e ultimo aki a sirbi di inspiracion pa loke ta trata fortificacion di e espiritu empresarial na Aruba.”
Durante e simannan benidero Minister Arends lo hiba combersacionnan cu partnernan y demas stakeholdernan local pa asina duna continuacion di e palabracionan haci.