Nos grandinan cu ta pasa dia na Centro Kibrahacha a traha hopi pinturanan cu ta cla pa bay den exposicion dia 18 di maart segun Sr. Jeffrey Matos kende ta administrado di Club Kibrahacha 60 plus.
Ta haci esaki hunto cu Ford Zoutman y e invitadonan di e exposicion aki di 18 di Maart cu e comunidad di Aruba por pasa y wak e bunita arte cu nos grandinan a prepara na Centro Kibrahacha. Ainda tin hopi hende cu no conoce e centro como un centro pa nos grandinan y esey ta hopi importante pa ariba un dia liber, nan pasa y wak kico e grandinan na Kibrahacha por haci.
Kibrahacha toch ta conoci den comunidad. Y e aña aki, ta bay haci un investigacion nacional, hunto cu minister di Salubridad Publico pa investiga kico ta e necesidad di hendenan cu ta bira grandi, kico tin pa nan den comunidad. Na Centro Kibrahacha nan por ofrece hopi. Tanto riba tereno social, educativo, movecion y activo. Kibrahacha ta activo ya pa 30 aña.
Pero ta importante pa haya feedback di e comunidad y kico ta e necesidad y esey ta e tarea pa e aña aki pa nan cumpli cun’e.
Pa Sr. Dario Werleman cu ta duna e curso di pintamento na nos grandinan a splica cu ningun cuadro ta na benta, pero nan ta pa show so. For di dia cu a cuminsa cu e grupo, por a ripara cu nan tabata por a pinta, pero ta falta technica. A pensa pa haci e ora algo na Maart, relaciona cu dia di Aruba.
E idea no ta pa traha artista akinan, ta hende grandi cu ta bin na e Centro, pa pasa dia, pasa dushi, pasa pret. Pero si por haci algo extra, ta haci esaki. Tin paar di pintura bon hinca den otro y ta kere cu e pinturanan lo haci algo leuk pa e dia aki. Tin hopi cuadra si, pero no por bay cu tur, dus lo bay cu 30 cuadra.