Diabierna anochi Michelle Obama a duna su ultimo speech, por cierto uno hopi emotivo, gradiciendo su siguidonan bisando: ” Tabata e honor di mas grandi di mi bida, di tabata boso Primera Dama y mi ta spera di cu boso por ta orguyoso dimi”.
“Mi kier pa e hobennan sa, cu nan ta si nan importante y cu nan tin un luga caminda nan ta pertenece”, Obama a bisa, cu un bos cu a kibra varios biaha di emocion. “No tene miedo. Hobennan, boso a tendemi? Mantene bosonan mes enfoca. Sea decidido, tene speransa y tuma poder den boso man. E poder di educacion. Despues bay den mundo y uza e conocimentonan aki pa construi un pais digno di un promesa sin limite. Lidera atrabes di ehempel y nunca tene miedo”, tabata palabranan di Michelle Obama.
Obama a tene su speech final durante un evento caminda el a reconoce e Consehero Escolar di Aña. Y el a realisa esaki exactamente dos siman prome cu e president electo, Donald Trump asumi e cargo presidencial.
E ceremonia aki, cu e Primera Dama a cuminsa na 2015, ta busca pa resalta e conseheronan di scolnan secundario cu a demostra habilidadnan di liderazgo. Ademas, esaki ta parti di su programa “Reach Higher” cu ta promove educacion superior.
Durante su periodo den Cas Blanco, Michelle Obama a defende educacion, salud y tambe famia di militarnan. El a haci esaki asina tanto cu e tabata usa East Room of South Lawn pa trata e temanan aki.
Ademas, e tabata e anfitrion di actuacionnan musical y teatral di White House, caminda scolnan di Washington tabata wordo invita pa participa den eventonan cultural cu, di otro manera, kisas nunca nan lo por a experencia.
Durante campaña politico, Obama tabata tin criticanan fuerte pa Donald Trump. Den varios discurso, el a expresa cu e remarcanan di e ex candidato presidencial tocante hende muhe a afecta su persona masha hopi.
Awor cu e ta saliendo for di White House, e Primera Dama a revela cu e lo haya falta di e atencion special di e personal di White House como tambe e sentido di historia.
“Tin algun momento”, Obama a bisa na e revista Vogue den su edicion di November ultimo, “caminda mi ta contempla e bista cu tin for di e bentana di e South Lawn y caminda e por a aprecia e Washingon Monumento, ariba un dia caminda awa ta yobe , tur rond e yerbanan tabata berde y flornan tabata nace. E ta algo masha bunita. Y ta e momento ey cu a pasa den mi mente, cu mi lo haya falta di lanta tur mainta y admira e bista aki, cada biaha cu mi kier.” Sinembargo, ta su tempo”, Obama a bisa na e revista.
E evento di diabierna no tabata e ultimo aparicion di MIchelle Obama. Esaki lo tuma luga diaranson proximo, durante e programa “The Tonight Show with Jimmy Fallon.”