TEESSIDE, Reino Uni – “Parce, mi figura ta tipico di un hende cu ta sufri di e enfermedad aki: cintura chikito, heup hancho, cu pianan grandi y solido,” Zoe, di 24 aña, for di Teesside, Reino Uni, a bisa. E ta referi na un condicion debilitante cu ta calcula cu ta afecta rond di 11% di hende muhe, pero incluso dokternan no ta echt haci caso di e enfermonan di lipedema of lipeodema, declarando cu e pashentnan simplemente ta gordo.
Esey por cambia
Un investigacion nobo riba e enfermedad aki ta den curso, cu expertonan di e Hospital St. George y e Universidad di London, cu a cuminsa explora e base genetica di e enfermedad, cu e obhetivo di haya su causa.
Zoe a wordo diagnostica cu lipedema despues cu el a perde 19 kilo di peso y a noa cu “curiosamente, e no tabata perde nada den su pianan. Di hecho, el a sinti manera cu cada biaha nan tabata mas grandi.”
El a pidi un cita cu dokter y eventualmente a bis’e di kico e tabata sufri.
“Semper mi tabata sa cu mi pianan tabata diferente. E cuerto tabata tin buraco y mi enkelnan tabata inexistente,” el a bisa. “Pero mi no a pensa cu e por tabata algo asina grave.”
Sin embargo, pa e consternacion di Zoe, e ta.
“Mi tin pashentnan cu lipedema di 20 y poco aña den rolstoel,” Vasu Karri, un ciruhano plastico cu ta specialisa den e condicion, a splica.
Zoe a sali na estado poco despues di su diagnostico y su sintomanan a empeora durante e embaraso.
“Tempo mi tabata na estado di ocho luna, mi tabata sinti manera cu mi pianan tabata kima. Mi pareha no tabata compronde con mi tabata por a sigui cana. Mi pianan tabata parce manera e bestianan cu ta wordo traha di blaas.”
Segun Karri, “e condicion ta progresivo, loke ta nifica cu e ta empeora cu tempo. E pashentnan por sufri dolor, osteoatritis, trastornonan di salud mental y tin biaha, incapacidad pa cana.”
E ta afecta princpalmente muhenan (tabata sa di poco caso den hende homber) y ta implica un acumulacion anormal di celnan di vet na e pianan, bil y e parti atras. Mientras cu e planta di pianan mes no ta mustra afecta, e pashentnan ta nota cu nan pianan mes ta amplia for di e enkel pa e heup. E pianan ta sinti suave “pastoso” y sensibel na na tacto y hopi biaha e ta haya herida facilmente.
Tin un idea eroneo cu lipedema ta wordo causa pa obesidad. Segun Karri, “no tin evidencia confiabel cu e dieet ta impacta of influencia den e enfermedad.”
Parce di tin un componente genetico den e enfermedad y mayoria di e victimanan ta wordo haya durante pubertad, embaraso of menopausa, loke ta indica cu e tin di haber cu un factor hormonal.
E diagnostico ta specialmente devastador pasobra e opcionnan di tratamento ta limita.
Algun pashent ta beneficia di prendanan di compresion.
Fuente: http://caracol.com.co/