Actualmente Servicio Meteorologico ta siguiendo di cerca un area di presion abou ubica mas of menos 2050 km oost di Aruba.
Te cu awe mainta e sistema aki ta moviendo west.
E sistema tropical aki su movecion ta depende di dos factor.
1. Un sistema frontal cu lo sali for di Merca diahuebs/diabierna.
2. Un area di presion halto ubica riba Oceano Atlantico.
Te cu awe diamars e indicacion ta cu e sistema tropical lo aumenta den forsa y su centro di circulacion lo por pasa mas of menos 150-200 km nort di Aruba diabierna.
Ultimo indicacion ta cu e sistema tropical aki por haci e aire mas humedo y instabil, y aumenta nos chens pa awasero for di diahuebs. Den e periodo di diahuebs pa diadomingo biento por boltia tambe y lama tambe, pues lama por bira bruto hasta banda di e area di hotel, cu normalmente ta protegi.
Door cu e sistema ta debil ainda y mester desaroya y ta basta leu, ta dificil pa duna un bista exacto ainda ariba e efectonan. Sinembargo, cu desaroyo of no por spera rafaga di biento durante di awasero cu por yega forsa modera te fuerte (Beaufort 6 te 7, 22 te 33 nudo). Awasero por causa inundacion temporal den cierto caya of barionan di e isla.
Ta avisa pueblo pa keda pendiente pa boletinnan oficial di tempo di gobierno via e canalan oficial di Gobierno.
Servicio Meteorologico di Aruba ta den contacto cu diferente otro servicio meteorologico di e regio, National Hurricane Center na Miami y KNMI.
Un proximo aviso tocante e situacion di tempo tropical lo wordo emiti awe entre 6-7 pm.
E boletinan di prensa relaciona cu e sistema tropical ta wordo haci den coordinacion cu Minister di Transporte, O.E. Oduber y Minister di Asuntonan General M. Eman.