Sr. Leonardo Maduro, candidato ariba partido MAS ta di opinion cu e 30% di reduccion ariba e debe di studielening no ta e strobacion pa nos hobennan bolbe nan pais.
Pa di prome, segun Sr. Maduro, economia di pais Aruba ta na werki, no tin trabao. E hobennan, si nan bin bek mes, nan no tin trabao. Ta haci mucho politica cu esaki. Sr. Maduro como un Hoben Profesional, esaki ta afecta e tambe.
E 30% di reduccion cu gobierno a bin cun’e, Sr. Maduro di MAS lo kier sa cuanto di nos hobennan a regresa bek y cuanto a paga bek. E reduccion ta si bo paga bo debe den un solo paga. E 30% di reduccion no ta pa haci politiek cun’e.
Sr. Maduro a sigui bisa, pa drecha e economia, haci’e atractivo bek pa nos studiantenan por regresa. E miho manera ta pa diversifica e economia, incentiva nos desaroyo cu small business y cu tur e plannan economico cu MAS tin pa Aruba.
Di otro banda, e hoben cu bin Aruba lo kier gana un salario halto, y esey ta un obstaculo grandi pa e hobennan regresa. E fiansa di estudio di Hulanda esey ta e obstaculo di mas grandi cu e studiante ta hay’e cun’e. Pasobra bo ta bin Aruba gana un salario na florin, mientras cu bo tin cu paga bo fiansa di estudio na Euro. Esey tambe ta forma un obstaculo.
Mayoria di e hobennan cu a bin bek Aruba, ta pa ta mas cerca di famia. Pero si kier stimula pa mas hoben regresa, lo mester fortifica e economia. Mester haci cambio den ley, haci’e mas flexibel, pa e small business por wordo forma mas facil y stimula e hobennan cu kier bin bek, cu nan por habri nan mesun empresa, segun Sr. Leonard Maduro, candidato riba lista di partido MAS.