Den fin di siman un biaha mas un asesinato a tuma lugar na club nocturno Olde Molen, segun parlamentario di fraccion di MEP, Dangui Oduber. Esaki no ta e prome asesinato cu a tuma lugar eynan. No solamente tabata tin asesinato den fin di siman sino un comerciante tambe a wordo atraca.
E situacion cu tin pa cu criminalidad ta for di man for di hopi aña caba. Aruba no ta un pais sigur mas y esaki ta wordo sinto den tur skina na Aruba. Un encuesta a wordo haci pa un compania priva y e resultado ta cuadra cu e realidad cual ta 7 di cada 10 ciudadano ta sinti nan mes insigur na Aruba actualmente. Hopi aña pasa a cera cu un record di mas cu 50 atraco, esaki ta mas cu 1 atraco pa siman. E aña aki no a habri diferente. Tin un problema structural di criminalidad y ta obvio cu e Gobierno di AVP no por a atende cu criminalidad manera cu mester ta. Aruba durante e ultimo 8 añanan aki no a bira mas sigur sino a bira hopi mas insigur. Tur indicador ta demostra esaki y esaki no ta percepcion mas, no ta high season sino e tristo realidad.
Tin demasiado arma di candela riba caya. No tin control, no tin razzia ta tuma luga pa kita tur e arma di candelanan for di caya. Riba caya tin mas arma di candela cu polisnan mes tin na nan disposicion. E ta un situacion di gravedad na momento cu perde control riba e situacion pa combati criminalidad. Aruba ta out of control y bo ta sinti esaki.
Partido MEP a prepara un plana pa combati criminalidad cu man duro. Prioridad mester ta elimina di inmediato e cantidad di arma di candelanan cu tin riba caya. Mester traha mas riba prevencion. E helicopter mester bin bek pa yuda combati criminalidad. Tin un scarsedad di polis na e momentonan aki. Mester atende cu esaki como priordad. Nos poblacion a crece y tin necesidad pa mas agente policial. No tin control riba nos costnan actualemente. Mester controla nos fronteranan y percura pa tur caminda rond di Aruba tin control. Nos a nota tambe cu te hasta den e zona turistico turistanan ta wordo atraca. MEP lo introduci un sorti di ‘’tourism police’’ cu lo percura pa garantisa siguridad di nos bishitantenan.
Despues di 8 aña nos pais mester di un cambio. Gobierno di AVP no tawata tin un plan pa combati criminalidad, nan no a haci Aruba mas sigur y nan tin nos hendenan ta biba den panico y angustia y esaki lo yega na su fin dia 22 September 2017!