Presidente di Parlamento, drs. Mervin Wyatt-Ras, hunto cu coleganan Parlamentario y representantenan di instancia y entidadnan tabata presente durante inauguracion di e plaza tras di Parlamento y e edificio gubernamental “Kokolishi”. Ariba dicho plaza cu a haya nomber di Padu Lampe a pone alabes un plateau di e tres baluarte cu a haci posibel cu awe nos tin un himno titula “Aruba dushi tera”.
Wyatt-Ras ta felicita famia di nos baluartenan Lio Booi d.f.m., Rufo Wever d.f.m. y Padu Lampe cu ta na bida y ta gosa di e bunita edad di 97 aña.
Wyatt-Ras ta considera di importancia cu gobierno ta reconoce nos baluartenan pa di e forma aki rindi homenahe na nos heroenan y fortifica nos identidad. Un pais cu ta reconoce su hendenan ta fortifica su historia y ta duna un bon ehempel na e futuro generacion di con pa trata esnan cu a contribui grandemente na nos historia y nos cultura. Pa cu esaki e minister di cultura ta responsabel y den e caso aki ta e minister Presidente y tin cu bisa cu el a inicia cu un proceso positivo y relevante pa nos pais.