Presidente di Parlamento ta duna un splicacion encuanto e critica cu e ta haya tocante cu tin documentonan ter inzage den Parlamento den presencia di trahadornan di minister. Aki ta bay asina leu di yama presidente di parlamento dependiente di Gobierno. Mervin Wyatt-Ras kier coregi e remarcanan aki.
Ta asina cu normalmente ta solamente durante reunion publico gobierno sa pone stukken ter inzage. Ora stukken ta ter inzage nan no por ser reproduci, ni por saca foto di nan. Esaki ta desde cu Parlamento di Aruba ta existi. Ora tin stukken ter inzage Parlamento tin cu tene bista ariba e stukken. Den e caso aki gobierno a regla enbista di importancia di e reunion tocante CITGO cu ta pone e stukken di antemano ter inzage. Pues por a warda te durante e reunion pero a scoge pa kom Staten tegemoet. Den e caso aki Parlamento no por bay pone e personanan pa keda vigila e stukken y hunto cu Griffie a scoge pa haci’e di e forma aki, esta di laga trahadornan di griffie pa tene bista riba e stukken. Esaki no ta nada inconstitucional ni ta trapa riba ningun Parlamentario.
Presidente di Parlamento despues di consulta cu lidernan di fraccion den un senioren convent a dicidi di manda gobierno un carta pa pidi pa e cada fraccion por haya e documentonan enbes di bin lesa nan den Biblioteka.
Gobierno a contesta Parlamento cu esaki no ta posibel. Motibo cu gobierno a duna ta cu enbista cu ta trata asuntonan confidencial y cu ta trata entidadnan internacional.
Aki ta keda na cada Parlamentario pa asina haci loke nan mester haci cu e contesta. Ta facil pa purba tira culpa riba presidente di Parlamento. Tur parlamentario y tur fraccion tin nan responsabilidad y tin caminda pa cana pa pidi stukken. Di su banda Presidente por tuma decision tambe di pone inzage manera normalmente ta haci den e reunion publico so paso obviamente fraccionnan den oposicion no kier lesa esakinan di antemano den presencia di esnan cu tin cu tene bista. Den historia no ta asina cu parlamentarionan ta haya stukken ter inzage di antemano. Kico oposicon kier anto?
Lastra un presidente di Parlamento recien nombra di estado aki no ta na su lugar. Wyatt-Ras ta haciendo su trabou di ofrece informacion pa un debido preparacion.
Banda di esey tur parlamentario na diferente ocasion a haya informacion tocante e procesonan di deliberacion cu CITGO dor di e comision y tambe hunto cu e minister concerni. Wyatt-Ras ta haya incorecto cu ta recuri na politikeria pa por lastra su persona riba medionan di comunicacionnan y facebook. Ta keda cu e refineria lo pone pan ariba mesa di hopi famia y cu henter pueblo ta ansioso pa pasa e ley pa por yega na reapertura. Unico cos cu Wyatt-Ras ta desea ta cu e refineria por habri pronto pa duna nos tata y mamanan di famia un entrada digno.