Mervin Wyatt-Ras (AVP): Endy Croes mester bay curso pa traha den Parlamento

0
RBC Juli 2018
ling and sons porciento

Parlamentario, drs. Mervin Wyatt-Ras, a tuma nota di un declaracion fuera di sla di sr. Endy Croes tocante Wyatt-Ras durante e reunion di ayera dia 28 di juni cu minister Romero encuanto di “Fast Ferry”.
Segun Wyatt-Ras Endy Croes no ta compronde kico ta su rol como Parlamentario, ni e sa ken ta den cual comision.
Parlamentario Mervin Wyatt-Ras den e caso aki a bai un reunion di cual e no ta miembro pasobra e ta interesa den futuro di nos pais. Wyatt-Ras ta haci esaki mas biaha pa e keda bon informa y ora e bai reunion e ta participa tambe. Pues ta un mentira di Croes cu Wyat-Ras no ta bin trabou. Ademas na varios ocasion ora Wyatt-Ras si ta na trabou no ta ni mira ni sombra di Sr. Croes na trabou. Wyatt-Ras berdad a yega tiki laat e dia aki, dor di un otro compromiso pa duna sosten na pueblo. Atrobe mester coregi mentira di Croes cu Wyatt-Ras lo a keda wak futbol. Ademas te con ley e sa ta Croes tabata den Lotto pa deporte y tabata bai tur wega hasta den exterior.
Wyatt-Ras a haci berdad varios pregunta durante e reunion pasobra no ta cla ainda kico precies lo ta e ventaha financiero-economico di un “Fast Ferry” pa pais Aruba. Ta hopi obvio cu Croes no ta compronde cu como parlamentario su rol no ta djies buig y bisa si na gobierno of stempel loke gobierno bin cun’e, sino pa haci pregunta, cuestiona, controla y busca claridad den interes di pueblo. Su rol no ta pa conta cuanto pregunta su coleganan haci sino pa e tambe por haci pregunta.
Wyatt-Ras no a bisa na ningun momento cu e ta contra ningun proyecto sino su preguntanan tabata skerpi. Endy no mester tin miedo. Kizas su interes den e proyecto aki ta grandi, pero aki no ta bai pa interes ni di Endy ni di Minister ni di e compania cu ta bin cu Ferry sino di pueblo di Aruba. Ta importante pa sa con e control di entrada lo ta na porta, no solamente di id., sino tambe di e 900 autonan plus trucks cu lo drenta Aruba. Lo bai scan esakinan? Ademas e cantidad di auto cu drenta Aruba ta zona hopi, ya cu nos tin hopi auto ariba caminda caba, polisnan tambe kizas lo haya mas trabou cu ya caba nan tin asina hopi peso riba nan? Wyatt-Ras a puntra pa sa precisamente cuanto nos pueblo mes lo gana di e proyecto aki, aparte di esnan cu si lo cobra? E cantidad di trahadornan cu lo haya trabou no ta zona mucho. E parlamentario tambe a trece padilanti e proteccion di nos trahadornan local cu ora habri porta y manera tur ta bisa hendenan di un isla por drenta y traha na e otro isla y tambe for di Reino, con esaki lo ta? Ademas e control di esnan cu por drenta comete fechoria y trafica droga. Esaki ta rekeri mas control y natural gasto. Wyatt-Ras a puntra ademas kico lo para cu Citgo cu tambe ta riba e tereno aki? Tabatin mas pregunta ainda.
Aunke Wyatt-Ras no por divulga contenido di contestanan di esnan cu a haci presentacion dor cu ta un comision den cual e informacion ta confidencial e ta sinti cu su preguntanan a ser considera dor di e presentadornan como preocupacionnan husto y no manera sr. Endy Croes kier haci como sifuera e preguntanan tabata infantil y hasta inecesario. E preguntanan cu e ta bisa cu a ser splica caba ora Wyatt-Ras a haci nan ainda no tin contesta contundente ariba nan. Falta mas estudio. Pesey mes Wyatt-Ras no ta compronde e reaccion irrational di Croes. E ta haci como sifuera di dje e proyecto ta. Cu Endy Croes ta menasa cu Wyatt-Ras lo bai haci uzo di e ferry ora e bin tog, ta stranja Wyatt-Ras di un persona cu su partido a vota contra y critica Green Corridor, hasta taha tur hende pa no core riba e brug, y awe ta core dushi dushi pariba pabou riba e brug y hasta su lider ora e tabata na Corsou a lubida cu na Aruba por skuch’e ora ela gaba e brug cu tanto ela critica. Kizas sr. Croes a pega cu mesun malesa di su lider pa ganja. Esey si ta ehempel di un politico panlefi.
Hecho ta cu Croes envez di acusa hende di bisa “non sense” e mester bai curso pa sinja kico ta su rol y trabou den Parlamento. Parlamento lo mester cuminsa haci tur reunion no skondi manera Croes kier pero habri of openbaar asina tur hende por skucha berdaderamente cuanto pregunta e mes ta haci envez di para wak ki otro ta haci.

Comments

comments

C: Heineken
new india
dvg