“E merito y reconocemento total pa e logro di awe; pa e dia historico di awe ta bay pa mi colega Mike de Meza.” Asina Minister President Mike Eman a bisa den su introduccion na e conferencia di prensa tras firma di e actanan di traspaso di refineria for di Valero pa Pais Aruba. Recordando tur loke ta tras di lomba, e mandatario a reconoce cu, te hasta na e momento di menos speransa, Minister Mike de Meza ta esun cu a persevera pa sigui te ora cu a yega na un resultado positivo.
“Nos a cana e caminda aki hunto pa seis aña largo… y a yega un momento cu mi mes a pensa cu nos a yega na e punto cu mester a cera e capitulo aki di purba logra un alternativa pa un partnership pa e refineria. Pero tabata su empuhe y ultimo intento acercando CITGO, cu nos a logra awe e reapertura di refineria,” asina Premier Eman a bisa referiendo na su colega y tocayo.
Di su banda, Minister de Meza a demostra un humildad caracteristico di su persona, dor di no acepta tur e elogionan aki su so, pero compartiendo e storia di esfuerso y amor pa nos pueblo hunto cu Premier Eman. E titular di Energia a conta cu tabata innumerabel e biahanan cu el a acerca Prome Minister pa comparti e ultimo desaroyonan, pero tambe pa delibera y hunto delinea e stapnan pa tuma.
“No ta mi so! Semper cu a traha pa cu e topico di refineria y otro, no tabatin ni un dia cu mi no ta bati na porta di Prome Minister pa inform’e di kico otro por ta posibel.” Ademas di confirma e relato treci cu mas detaye di con a presenta e idea pa bay Houston y papia cu CITGO; argumentando tambe e pakico tabata necesario pa Aruba ta esun cu ta tuma iniciativa y pusha, Minister de Meza a gradici e aporte valioso di e ekipo cu a para banda di dje durante henter e trayecto. Mescos cu ne, ta trata di Arubianonan cu talento, conocemento y experticio; pero mas importante, cu bienestar di Aruba na pecho.