E Oficina di Control di Activo Extranhero (OFAC), dependencia di e Departamento di Tesoro di Merca, diahuebs a emiti un orden ehecutivo cu ta autorisa transaccionnan cu e bono 2020 di Petroleos de Venezuela (Pdvsa).
E condicionnan aki ta permiti solamente pa esaki, segun e licencia nr. 5. Esaki lo permiti tenedornan “di impone e derechonan relaciona cu e bono PDVSA 2020” den caso di incumplimento. E operacionnan aki tabata prohibi pa e orden ehecutivo 13.385, emiti dia 21 di mei ultimo pa e gobierno di Donald Trump, como medida di “presion” conta di gobierno di presidente Nicolas Maduro.
E orden ehecutivo anterior, cu awo tin un excepcion, a impone limitacionnan na ciudadano of companianan Mericano pa realisa operacionnan di benta di debe y activonan cu debenan Venezolano. E medida a wordo adopta como represalia pa e eleccionnan celebra dia 20 di mei, den cual Maduro a wordo reeligi presidente y e administracion Mericano a yame fraudulento.
Den e oportunidad aki, e canciyer di Venezuela, Jorge Arreaza, a bisa cu e accion ta “un locura, un contradiccion absoluto di derecho internacional”.
E permiso nobo aki, cu ta corresponde solamente na e unico titulo di PDVSA cu ta garantisa cu 50,1% di e accionnan di CITGO, filial di e compania estatal petrolero Venezolano na Merca. E no ta kita e restriccionnan pa otro bononan di e pais Suramericano, entre cual ta haya e prohibicion pa likida activonan estatal, como tambe pa cobra saldonan di cuentanan relaciona cu petroleo. Asina aki, ta busca manera di restringi e fuente di ingreso principal di Venezuela.