WASHINGTON D.C., Merca – Cas Blanco ta evaluando stranheronan, entre otro Hulandesnan, na nan yegada na Merca, e peticion pa tira un bista riba informacionnan sensitivo for di nan celular. Ta trata aki por ehempel di lista di contactonan, paswoord di cuentanan di social media y informacion financiero.
Funcionarionan di Gobierno ta haya ta necesario esaki den e lucha contra terorismo. “E intencion ta pa haya sa cu ken bo tin contacto,” un fuente den siguridad a bisa The Wall Street Journal. “E contenido di un telefon por ta di gran balor.”
Ya caba e biahero por wordo pidi pa informacion riba nan cuentanan di social media.
Prohibicion di entrada
Te asina leu ta saliendo informacionnan via fuentenan anonimo y no ta cla con serio y concreto e consecuencianan ta. E minister di siguridad interior, John Kelly a bisa na Februari riba un momento durante un sesion den Congreso.
“Nos kier puntra por ehempel ki sites un hende a bishita y pidi e persona aki pa paswoordnan. Si e no kier comparti e informacion aki, e no mag di drenta.” Cincuenta organisacion di derechonan civil ta yama esaki un “invasion directo di derechonan fundamental.”
Kelly ta haci esaki den cuadro cu e prohibicion di entrada pa ciudadanonan di Irak, Iran, Siria, Yemen, Somalia, Sudan y Libia. E medidanan aki cu e corant ta menciona, lo ta contando tambe pa aliadonan fiel di merca.
Programa di visa
Hulanda ta pertenece na un grupo di 38 pais caminda cu ciudadanonan por drenta sin un visa. Tambe paisnan manera Australia, Alemania, Francia y Reino Uni ta pertenece na e lista aki.
A cambio pa mantene esaki, nan mester comparti informacion y controlnan di paspoort.
Fuente: NOS.nl