Den henter e pagina scur cu a ser skirbi door di Gabinete Mike Eman pa loke ta e nombramento di nos Gobernador sr. Alfonso Boekhoudt, nos a haya un lider di fraccion di AVP, esta Rene Herde kende den un atake di desesperacion a acusa partido MEP di ta hunga wega politico y ta causa daño na Aruba y na e funcion di Gobernador. Alabes el a trece padilanti cu tin un division grandi den e pais aki y cu e division ta riba consenshi di e Gobernador nobo y di MEP. Ta increibel con Rene Herde – despues cu su lider y alabes Minister President Eman a comete un blunder di marca mayor y a fracasa den su intento pa nombra sr. Angel Bermudez como Gobernador – awor ta haya ta bon di tira su skopnan acostumbra den direccion di MEP, siendo cu nos partido no tin arte ni parte den henter e bululu cu su lider Mike Eman a causa den Reino Hulandes.
Ley, regla y palabracion
Alavez no ta forma con Rene Herde manera un gran salbador hipocrita diripiente ta sali na defensa di tur ley, regla, procedura, palabracion y respet cu mester existi den Reino Hulandes, caminda el a declara entre otro cu “un pais y un Reino ta traha a base di ley y den cual respet pa ley, regla y palabracionnan ta fundamental”. Despues den un otro comunicado Rene Herde ta papia di “para pa ley y husticia bao tur condicion”. Mar’e cu bao tur condicion Rene Herde y AVP durante e ultimo 7 añanan por a pensa asina! Por mira tambe cu tin varios otro mandatario y parlamentario di AVP cu den e ultimo dianan aki tin nan boca yen di ley, regla y palabracion.
Sinembargo locual ta un hecho condenabel ta cu durante e ultimo 7 añanan Gabinete Mike Eman sin ningun piedad a trapa riba tur ley, regla, transparencia y procedura existente den nos pais. Ningun ley no a scapa na na man!
Estado di derecho na peliger
Aki partido MEP ta trece e siguiente ehempelnan di e maldadnan cometi pa Gabinete Eman:
1. Gabinete Eman constantemente ta viola y trapa riba e Ley di Comptabilidad, caminda ministernan di AVP sistematicamente ta surpasa nan propio presupuestonan causando e Megadebe di mas di 4 biyon florin y caminda te hasta Minister di Infrastructura Sevinger a surpasa su presupuesto cu mas di 1000% y pa despues su persona bay busca su salbabida for di fraccion di AVP den Parlamento.
2. Gabinete Eman constantemente ta viola y trapa riba leynan di belasting, caminda nan a exonera miyones di florin di belasting na nan compinchinan politico y sponsornan di campaña. Tambe e exoneracion di 61 miyon florin na SVB! No mester lubida con nan a kita varios profesional for di Servicio di Impuesto pa motibo cu e profesionalnan aki tabata cumpli cu nan tarea pa cobra e 280 miyon florin di BBO riba export di Valero. Den Corte e gobierno di AVP a ser condena y caminda huez a declara cu Gabinete Eman a mina nos estado di derecho.
3. Gabinete Eman constantemente ta viola y trapa riba derecho di nos ciudadanonan caminda entre otro, manera ladron den anochi, a laga basha abao un kiosco di un comerciante humilde situa den Caya Betico Croes. Aki tambe den Corte huez a sentencia y a declara cu gobierno a zaag na e pianan di nos estado di derecho.
4. Gabinete Eman constantemente ta viola y trapa riba derechonan di nos ambtenaarnan caminda nan ta persigui nan politicamente y cu e propio Rene Herde tur dia ta menasa di haci henter e aparato gubernamental MEP-Proof.
5. Den Parlamento tambe partido AVP ta trapa riba tur ley y reglamento existente caminda e Presidente di Parlamento no ta yama reunionnan publico pidi pa fraccion di MEP dentro di 30 dia manera ta prescribi den reglamento di Parlamento.
Cu e 5 ehempelnan describi aki ta mas cu visto cu Gabinete Eman ta sinonimo na actua y trapa riba Ley di Comptabilidad y otro leynan existente den e pais aki. Alabes e gobierno aki ta esun di mas intransparente den historia di nos Pais. Awe cu ki cara Rene Herde tin e curashi di papia di respet pa ley, reglamento y palabracionnan haci den Reino Hulandes?
Si bo kier drecha mundo, cuminsa cu bo mes!