Despues cu partido AVP a desgracia nos pais financieramente cu un Megadebe di mas di 6 biyon florin, awor parlamentario Marlon Sneek kende no tin ningun nocion di cifranan financiero diripiente a haya curashi pa cuestiona e postura cu MEP a tuma pa loke ta e aumento drastico di gastonan total di Gobierno y cual aumento ta ser refleha tambe den e presupuesto cu tin cu wordo trata ainda, esta esun di 2017. Marlon Sneek a trece entre otro padilanti cu gran parti di e aumento di gastonan aki tin di haber cu e supuesto maneho cu su gobierno ta hibando pa aloca mas placa den AZV, husticia, salubridad, enseñansa etc.
Aumento di gastonan
Pero den e mesun rosea e no ta splica kico Gabinete Eman ta haciendo pa reduci e gastonan den e cantidad ilimita di coordinadornan, huurmento di edificionan, propaganda politico paga cu placa di pueblo, gastonan di consehero y abogadonan, biahamento etc. Structuralmente Gabinete Eman a sigui aumenta tur e gastonan aki y cual siguramente a conduci cu awe nos ta sinta cu un Megadebe di mas di 4 biyon florin, sin conta acerca e gastonan den e proyectonan PPP.
Den su ignorancia Marlon Sneek no ta bin dilanti cu su famoso mesa y splica pueblo kico su gobierno a haci pa loke ta e normanan financiero cu nan mes a stipula durante e ultimo 7 añanan y esaki den cuadro di reduci e gastonan di gobierno.
Norma di 75 miyon florin
Na inicio di nan gobernacion nan a bin cu e bunita plan y norma di cuminsa reduci e deficit financiero tur aña cu 75 miyon florin. E tempo ey e deficit cu MEP a laga atras na 2009 tabata 163 miyon florin. Pues si sigui e pensamento di Gabinete Eman ya na 2011 e deficit mester a ser reduci te na 13 miyon florin. Pero kico nos a mira? Kibrando tur nan promesa di reduci e deficit financiero, esaki a ser aumenta durante tur e siguiente añanan: 2010: 188.6 miyon, 2011: 325.2 miyon, 2012: 443.3 miyon, 2013: 332.8 miyon, 2014: 405.8 y 2015: 201.7 miyon. Pues den total na deficit financiero: 1897.4 miyon florin. E aumento aki ta increibel y ta muestra cu Gabinete Eman t’asina iresponsabel cu nan no a cumpli cu e promesa cu nan haci di reduci tur aña e deficit cu 75 miyon florin.
Balanced Budget Akkoord
Despues Gabinete Eman por medio di Mike Eman y Mike de Meza a firma dia 5 di November 2013 un protocol relaciona cu e famoso Balanced Budget Akkoord 2013-2017 y caminda nan a acorda cu “voor het Land als geheel wordt een nominaal uitgavenkader vastgesteld dat de komende 4 jaar een plafond krijgt van 1350 miljoen florins”. Pues Gabinete Eman a priminti sagradamente cu durante e periodo di nan gobernacion (2013-2017) nan lo pone un plafond di gastonan y cu esaki lo no surpasa 1350 miyon florin. Pero kico nos a mira atrobe? Den forma structura Gabinete Eman a surpasa e norma aki di 1350 miyon florin durante e añanan 2013, 2014, 2015 y ta premira cu esaki lo ta e caso tambe den 2017, esta den e aña di eleccion. Naturalmente, pa oportunismo y propaganda politico mester sigui aumenta e gastonan den 2017!
Pues cu e dos ehempelnan aki ta visto pa henter comunidad cu Gabinete Eman y AVP no por a cumpli cu nan propio promesa y normanan di reduci e gastonan total di gobierno y cu Marlon Sneek den su ignorancia y limitacion pa conoce e parti financiero te ainda no ta mira den ki desaster su partido AVP a hinca nos pais aden cu nan malgastamento sin limite di placa di pueblo.