Hopi hende no sa pa ken vota si mira cu loke ta pasa den parlamento tin duda pa cual durante campaña, un gran cantidad di hende ta lamenta con cos ta bay cu ta trece duda pa ken pa vota segun Sra Evelyn Wever – Croes, lider di partido Movimiento Electoral di Pueblo, MEP.
Tin hopi keho tocante e nivel di parlamento actual y segun Sra. Wever- Croes, den un gobierno unda MEP lo tin e mayoria den parlamento, nan lo zorg pa e nivel subi. Con ta logra esaki? Door di tuma 3 acccion:
Un presidente di Parlamento firme pero alabes independiente. Un presidente di parlamento, cu lo sa di skucha e dolor y preocupacionnan di su oponentenan. Un presidente di Parlamento cu ta presidi e organo mas halto constitucional di nos pais y e ta percura pa e ta un presidente di tur. Tanto di banda di gobierno como banda di oposicion. Uno cu lo zorg pa mantene ordo. E lo no laga hende di su partido ofende otro y di otro banda, ta laga saca hende for di parlamento dor di polis. Un presidente di parlamento cu lo pone orde den sala di parlamento, di berdad y di forma independiente. Ora ta un colega ta comporta su mes na un mal manera, e ta hala su atencion, mescos e lo haci pa un oponente.
E di dos, ta e comportacion di e fraccion den Parlamento. E fraccion, mayoritario den Parlamento na momento cu MEP ta den gobierno, lo hiba debate al caso y ariba e puntonan di agenda. No tin nodi bin cu mama, cu tata, etc. ta bay mantene e punto di agenda. No ta interesa ki Mike Eman su famia ta haciendo, esey no ta interesante. Pueblo ta cansa di AVP cu unico cos cu nan por haci ta papia ariba famia.
Nan lo bay debate ariba e issuenann. Tin un debe, con ta bay baha nos debe, tin cu baha gasto, pero con ta baha e gastonan sin afecta e pueblo prome. Con ta bay baha e gasto di luho di e ministernan. Y e di tres, ta e nivel di e ministernan cu ta hiba debate. Ta mira un diferencia di dia y anochi, si tin un Minister manera Minister Bermudez den sala, of uno manera Minister Benny Sevinger ta den Parlamente. Minister Bermudez ta contesta al caso, y si e no por contesta, e ta bisa honestamente, cu e no por contesta. Pero e ta keda na un nivel halto ora di contesta su preguntanan.
Pa Sra. Wever- Croes e Presidente di Parlamento cu bin sinta 2017 pa 2021 mester ta un hende cu no ta bay na e nivel cu nos conoce awor aki. No manera minister Benny Sevinger, cu hasta na dado momento ta falta tur hende muhe respet, dor di zwaai cu maandverband den parlamento.
Ora Movimiento Electoral di Pueblo hiba debate den Parlamento, lo ta debatenan al caso, sin ofende niun hende, sin hinca niun familiar den e debate. Y asina lo mira cu e tres accionnan aki, e Presidente di Parlamento,firme y independiente. E accion mayoritario, cu ta debati ariba base di argumento, ariba puntonan di agenda y e minister cu ta tene su mes na manera madura, cu nos pais merece despues di 31 aña di Status Aparte. Y asina e nivel den parlamento lo drecha considerablemente. E unico factor cu no por influencia, ta oposicion.
E fraccion di MEP actual, no a haya chance di sinta riba e stoel di presidente di parlamento, pa demostra cu nan por hiba un debate den parlamento ariba nivel. Kisas lo ta un bon idea di eligi un persona a- politico cu lo dirigi full parlamento, y ta un proposicion cu lo mester traha ariba dje y wak con ta hinca esaki den otro. Sra. Wever- Crpes a bisa cu unico cos cu partido MEP ta pidi un chance pa demostra cu nan si por hiba un nivel di presidencia di parlamento. MEP tin e persona na bista, pero ainda no tin nada concreto.
Tambe partido MEP lo kier wak ken pueblo lo duna su confianza dia 22 di September proximo, durante eleccion 2017.