Aki ta sigui un mensahe di parti di Gobernador nobo di Aruba, sr. Alphonso Boekhoudt, na occasion di su huramentacion
Apreciabel conciudadanonan.
Awe mainta na Palacio Noordeinde aki na Den Haag Hulanda a tuma lugar e acto di huramentacion, pa mi persona ricibi e autorisacion official di Su Mahestad Rey Willem Alexander pa sirbi den e funcion di Gobernador di Aruba entrante 1 di Januari 2017. Na promer lugar ami y mi famia ta profundamente agradecido na Gobierno y Pueblo di Aruba pa e confiansa cu a ser brinda na mi pa sirbi nos pais den calidad di Ministro Plenipotenciario, y awor cu mi rol ta cambia pa uno di mayor responsabilidad, mi compromiso ta keda mescos cu nos pais. Lo mi sirbi Aruba y Reino cu e honor y respet cu nan merece. Mi lo haci mi maximo esfuerso pa eherce e mesun bon trabao cu mi predecesornan a haci den e funcion di Gobernador di Aruba. Masha danki pa tur felicitacion y palabranan di apoyo ricibi.