Cu lo a bin medida, ta algo cu FTA tabata spera mirando nos situacion financiero. E ta algo cu mester a bin caba. Sr. Hubert Dirksz, lider di sindicato FTA ta splica.
FTA a para ariba cu e medidanan cu mester bin, mester bin pa un tempo corto. E mester nifica cu e poder di compra di e trahadonan no lo wordo afecta y cu structuralmente lo coregi e erornan. Esey kiermen cu e gastonan di pais Aruba lo wordo reduci drasticamente. No por ta asina cu ta introduci medidanan, cu mester bay fia. Pero mester tene cuenta cu e gastonan mester baha structuralmente. E gastamento di placa di belasting di pais Aruba, mester baha drasticamente. Esey ta prome cos cu mester pasa. E di dos, con ta sigui awo?
Cualkier bezuiniging cu tuma luga, mescos cu Hulanda a haci, y despues e pais a crece economicamente. Esey mester ta e caso na Aruba. E mester ta corto, ta haci e reforma fiscal, haci e belasting directo pa uno indirecto. Pa tin un control, ya cu tin dunadonan di trabao, cu no ta cumpli cu e fondo di pension, no ta cumpli cu e pago di belasting.
Nos mester di un belastingdienst, un departamento serio y bon prepara pa yega na e placa ey cu bo mester di dje. Y tene cuenta, cu debenan atrasa, y no por laga e suma bira asina grandi pa companainan chikito. Si kita e placa for di e compania chikito, esey ta nifica cu e compania ta bay cera, empleadonan ta bay cas. Mester bin cu seriedad di e parti akinan, segun Sr. Hubert Dirksz, lider di sindicato FTA.