Mediador di Gobierno Anselmo Pontilius a reuni cu STA y Gerencia di Aruparking, caminda cu a formalisa e reconocemento. Den e proceso di referendum tabata tin un trahado cu tabata den e centro di prueba y normalmente no lo por a participa segun reglanan vigente. Esey a haci cu tabata tin e discusion riba e mayoria si of no. Despues cu e partidonan mes a sinta hunto y cu e sindicato a presenta pruebanan cu nan lo tin mayoria riba papel, a acorda e ora pa no tene un di dos referendum, pero simplemente firma un acuerdo, cual ta wordo yama un Process Verbaal y awe merdia a firma esaki. Formalmente nan a regla cu for di awo padilanti, e dunador di trabao y e sindicato nan tin cu mira con nan ta atende e condicionnan di trabao.
Tabata tin diferencia di opinion, pero evidente ta cu gerencia di rason, pasobra no por procede cu un situacion cu no por wordo valida. Den e sentido di un trahado cu a participa den e votacion, lo no mester a participa. Consecuentemente e resultado ey no tabata un resultado cu a pone riba papel. Ta dos alternativa tabata tin, sea ta convoca un referendum di nobo of e partidonan mes ta sinta cu otro y yega na un acuerdo, reconoce otro y formalisa esaki den presencia di mediado di gobierno cu un documento cu mediador ta prepara y no ta inusual. Esaki a wordo firma awe tambe, segun Mediador di Gobierno, Anselmo Pontilius.
Awor aki tin un trankilidad caminda cu e partidonan por sinta cu otro na mesa.