laindakemp
Presidente di e Comishon di Enseñanza Lainda Westerhoff a splica cu entrante dia 3 di Januari e ley di Enseñanza Obligatorio a drenta na vigor. E ley aki ta ensera cu tur hoben menor di edad te cu 16 aña ta obliga di bai scol. Ta importante pa duna informacion tanto na e maestronan como e mayornan kico e ley akita ensera pa ambos partido.

Segun Parlamentario Lainda Westerhoff, hopi mayor ta preocupa cu e aspecto financiero ya cu ta implementa e ley pero hopi bes no ta tene cuenta cu tin bes mayornan no tin e placa pa por duna nan yiunan un educacion. Westerhoff ta splica cu scolnan publico nan gastonan ta mas abou ymayornan por haci areglo di pago.

Controlnan ta bai bira mas rigoroso y Inspeccion di Enseñanza lo haci esaki den cooperacion cu polisnan di barrio unda cu lo bishita mayornan cu nan yiunan no ta bin scol pa asina wak kico ta e motibo di e ausencia di e muchanan. Pa tanto problemanan financiero of social, esta entre otro comportacion di e hobennan, lo busca un solucion.

E situacion aki ta uno preocupante segun Westerhoff. Mester pone e hobennan como prioridad ya cu na e momentonan aki ta menos cu 20% di e poblacion ta educa HBO of mas halto. Mester stimula mayornan y hobennan pa mira e importancia di un educacion. Hopi biaha mayornan ta prefera cumpra aparatonan di luho enbes di paga pa e hoben bai scol. Un opcion lo ta pa no duna e mayornan e placa directamente sino paga e cosnan necesario pa scol y unabes e gastonan basico ta paga, e ora por duna e mayor(nan) e placa. Tambe lo ta bon pa concientisa mayornan riba e importancia di traha cu un presupuesto. Tambe lo ta bon pa percura pa mayornan siña un ofishi ya asina e no ta depende di onderstand solamente. Esaki lo ta un paso sano pa Gobierno y asina ta yuda tambe esnan cu tin echt necesidad di e placa paso nan no por traha.

Otro punto cu Lainda Westerhoff a trece dilanti cu hopi biaha problemanan social ta bai vincula cu enseñanza. E ta enfatisa cu mester dedica mas tempo na e hobennan y mester purba na educa mamanan soltera cu no a logra caba nan scol pa un of otro motibo. Mester yuda e hobenan aki reintegra den comunidad por medio di un trabou enbes di keda cas y cobra oonderstand y keda den e ciclo vicioso aki.