E vacuna anual contra griep por evita mayoria di e mortonan relaciona cu griep entre mucha y adolescentenan, segun un estudio nobo cu e Gobierno Mericano ta calcula.
Investigadornan a haya cu aproximadamente tres cuarta parti di mucha y adolescentenan Mericano cu a fayece door di complicacionnan di griep entre 2010 y 2014 no a vacuna prome cu nan a bira malo.
Si tur mucha y adolescentenan vacuna contra griep tur aña, 65 porciento di e mortonan aki pro a wordo evita, investigadornan aki ta calcula.
Expertonan ta afirma cu e hayasgonan, publica online dia 3 di April den e revista Pediatrics, ta reforsa loke autoridadnan di salud ya a recomenda: Adulto y muchanan desde 6 luna di edad, lo mester vacuna prome cu cada temporada di griep.
“Esaki ta mustra, un biaha mas, cu e mucha y adolescentenan mester vacuna contra griep,” dr. Paul Offit, hefe di e division di enfermedadnan infeccioso di e Hospital Pediatrico di Philadelphia, a bisa.
Tambe el a enfatiza un hecho cu hopi mayor no sa: “E mucha y adolescentenan cu un bon estado di salud, por muri di griep y de hecho, nan ta muri,” Offit a adverti, kende no a participa den e investigacion.
Afortunadamente, esaki ta raro. Pero ora cu e sosode, “ta un tragedia,” Brendan Flannery, investigador di e Centronan pa Control y Prevencion di Enfermedad (CDC) di Merca, kende a dirigi e estudio, a bisa.
“E personanan cu frecuencia no ta pensa cu e griep lo ta hopi grave,” Flannery a bisa. “Pero e por ta, hasta mucha por muri.”
Mucha y adolescentenan cu ta perfectamente sano por enferma di gravedad cu griep y desaroya complicacion manera neumonia. Pero e riesgo ta mas halto pa mucha y adolescente cu cierto afeccion medico, manera asma, e enfermedad cardiaco, diabetes, fibrosis kistico y anemia drepanocitico.
E ekipo di Flannery a haya cu un vacuna contra griep por reduci e riesgo di morto entre e mucha y adolescentenan sano y esnan cu tin enfermedadnan di “alto riesgo.”
E hayasgonan ta basa riba 358 mucha y adolescente cu a fayece di un infeccion di griep cu a wordo confirma den pruebanan di laboratorio, a lo largo di 4 temporada di griep. Solamente un cuarta parti a wordo vacuna, aunke e tasa tabata mayor entre e muchanan cu enfermedadnan subyacente.
31 porciento di e 153 mucha y adolescente cu afeccionnan di alto riesgo a wordo vacuna.
E investigadonan a compara despues e mucha y adolescentenan cu 3 grupo grandi di mucha y adolescente Mericano, cual tasa di vacunacion tabata conoci. En general e 48 porciento di e mucha y adolescentenan aki a wordo vacuna contra di griep, segun e estudio.
Den promedio, e ekipo di e CDC a calcula cu 65 porciento di e mortonan relaciona cu griep, por preveni si tur e mucha y adolescentenan di Merca vacuna contra griep cada aña.
Entre e mucha y adolescentenan cu afeccionnan medico di alto riesgo, e vacuna por reduci e riesgo di mortalidad na mita.
E vacuna contra griep no ta perfecto, Flannery y Offit a reconoce.
Cada aña, e vacuna tin cu reformula, basando su mes riba e prediccion di expertonan riba loke bo sa di griep, lo predomina den e temporada venidero. Vacuna bo mes no ta garantisabo cu bo no lo contrae griep.
Cu un vacuna imperfecto, nos lo sigui mira morto pa motibo di griep,” Flannery a bisa. “Pero e vacuna si ta reduci e riesgo.”
Apesar di esey, hopi mucha y adolescente Mericano (inclui esnan cu tin enfermedadnan di alto riesgo) no ta vacuna.
Un rason probabel, Offit a bisa, ta cu e vacuna ta uno anual. Esey ta haci cu e no ta comodo, el a comenta, pero ademas, pa algun persona esey “ta implica cu e no ta hopi bon.”
Flannery a mustra di ta di acuerdo cu algun persona ta kere cu e vacuna contra griep no ta funciona. Te na cierto punto, el a bisa, cu esey ta debe na e dudanan riba loke ta griep.
Algun persona ta confundi ‘e cu un verkoud normal y hasta cu un infeccion estomacal. Si nan enferma cu e infeccionnan aki, despues di vacuna contra griep, nan ta kere cu e vacuna no a funciona.
Ademas, algun mayor ta preocupa cu e siguridad di e vacuna, vooral si nan yiu tin un afeccion medico cronico.
Pero, Flannery a enfatiza, “e vacuna ta wordo recomenda pa mucha y adolescentenan cu afeccionnan medico di algo riesgo pasobra e ta sigur.”
E realidad, afortunadamente, ta cu cualkier mucha of adolescente en particular tin un riesgo hopi abao di fayece pa e griep, Offit a señala.
Flannery a bisa mesun cos. Pero, el a añadi, e vacuna contra griep tambe por evita hospitalisacion, e ausencia laboral di mayornan y hopi malestar cerca mucha y adolescente.
Na Merca, e temporada di griep normalmente ta e periodo entre October y April.
Fuente: Health Day