Durante transcurso di e ultimo añanan, por tuma nota cu Aruba a keda confronta cu problemanan social grandi y preocupante. E problemanan social aki a conoce un desaroyo negativo den nos comunidad cu a hiba na desempleo, criminalidad, delincuencia hubenil, adiccion, famianan kibra y abuso di mucha. Partido MAS ta cla pa atende cu e problematica aki for di su rais, y tin un plan amplio pa por haci esaki. Na prome luga Partido MAS kier pone enfasis riba e casonan penoso di abuso di mucha cu definitavamente mester termina. Partido MAS ta condena cada un di e actonan aki y ta kere cu mester introduci un castigo mas severo pa cu esaki. Partido MAS ta kere den introduccion di un castigo minimo pa abuso di mucha y adulto. Banda di esaki Partido MAS ta kere den concientisacion di nos comunidad for di un edad hoben riba nan derechonan. Di e forma aki nos por reconoce y preveni situacionnan indesea. Esaki por medio di programanan di radio, television corant y medianan social. Pa loke ta trata desempleo Partido MAS ta garantisa cu e plan cu partido MAS lo ehecuta den gobernacion, lo crea cuponan di trabou den diferente sector y area. Haciendo esaki lo trece un balansa economico den famianan den necesidad y asina poco poco elimina desempleo. Na mes momento esaki lo tin un efecto positivo den comunidad y automaticamente lo tin menos problema den famia, delincuencia hubenil y criminalidad. Principalmente Partido MAS ta kere cu mester crea confiansa bek den comunidad y crea un speransa nobo pa nos pais. Partido MAS ta invita pueblo di Aruba pa sigui nan via nan pagina di facebook y keda pendiente pa haya sa mas di nan plan di gobernacion pa asina hunto kibra barera y crea futuro.