E consumo modera di chuculati ta asocia cu un riesgo significantemente menor di sufri fibrilacion auricular (FA), aritmia mas frecuente y riesgoso, segun un amplio estudio dirigi pa investigadonan di e Scol di Salud di Harvard (HSPH), cu ta suma evidencia riba e efectonan protector di cacao pa e curason.
“Nos estudio ta suma na e acumulacion di prueba riba e beneficionan pa salud di e consumo modera di chuculati y ta pone di relieve e importancia di e factornan di comportamento pa reduci potencialmente e riesgo di aritmia,” Elizabeth Mostofsky, di e Departamento di Epidemiologia di HSPH a splica. E tambe ta un di e autornan di e trabao difundi recientemente na Heart, un publicacion di British Medical Journal (BMJ).
Estudionan anterior ya a asocia cacao y e alimentonan cu e ta conten’e, cu beneficionan cardiovascular debi na su alto contenido di flavanol, e principal tipo di flavonoide cu, ademas di tin efectonan antioxidante, tin potencial influencia riba e salud vascular na promove un bon funcionamento di e adernan. Sin embargo, segun Harvard Gazette, te na e momento solamente lo bay tin un cantidad limita di investigacion riba e asociación entre e consumo di chuculati y e aparicion di fibrilacion auricular, cu ta afecta mas di 33 miyon di persona rond mundo y ta relaciona cu un riesgo cinco biaha mayor di sufri un accidente cerebrovascular, ademas di insuficiencia cardiaco, deterioro cognitivo, demencia y muerte. Ta calcula cu su prevalencia lo duplica pa 2050 pa e enbehecimento di e poblacion.
E trabao realisa na Dinamarca a inclui 55.502 homber y muhe. E investigadornan a considera e indice di masa corporal, e presion arterial y colesterol, cu a midi na e momento unda cu e participantenan a wordo recluta, entre December 1993 y Mei di 1997. Tambe a samina e condicionnan di salud di e participantenan, incluyendo presion halto, diabetes of enfermedadnan cardiovascular.
E resultadonan a mustra cu den comparacion cu e participantenan cu tabata come menos di un porcion di chuculati (di mas of menos 30 gram) pa luna, esnan cu ta consumi di un pa tres tabata tin un tasa di 10% menor di FA. E riesgo tabata un 17% menor na esnan cu tabata come un porcion pa siman, y un 20% mas abao cu tabata come di dos pa seis porcion pa siman.
Pa su contenido halto di cacao, cu ta loke ta mustra e efectonan protector pa e curason, e consumo di chuculati scur ta esun mas consehabel compara esun di chuculati cu lechi.
“A pesar cu e mayor parti di e chuculati consumi pa e participantenan di e estudio, probablemente lo tin concentracionnan relativamente abao di ingrediente potencialmente protector, nos a observa un asociación significativo entre come chuculati y un menor riesgo di fibrilacion auricular, loke ta sugeri cu incluso cantidadnan chikito di cacao por tin un impacto positivo den salud,” Mostofsky a señala, riba e trabao cual autor principal ta Kim Overdad. “Come chuculati den exceso no ta recomendabel pasobra hopi producto ta halto den sucu y vet, loke por conduci na aumento di peso y otro problemanan metabolico. Pero e consumo modera di chuculati cu contenido halto di cacao por ta un opcion saludabel,” el a añadi.
Fuente: www.clarin.com