Diaranson director di Bureau Sostenemi, Daphne Tecklenburg a haci un bishita di trabou cerca Minister di Asuntonan Social, Hubentud y Labor, drs. Paul Croes pa brinda un actualisacion riba e proyecto cu e mandatario a inicia bek na 2014. Edicion 2016 ta conta cu un total di 1.041 mucha di klueterschool participando, cu ta dobel e cantidad cu tabatin aña pasa. “Nos ta kere cu un mucha mientras mas hoben e sa kico ta su derecho, mas miho e por aplica esakinan ora e ta lanta; y despues ora e bira mayor, e sa ki derecho su mes yiu ta goza di dje tambe,” asina e director di e fundacion a comenta.
Despues cu e evento a keda lansa oficialmente dia 14 di september ultimo, a haya reaccion di mas scol, cual sigur ta un satisfaccion pa Bureau Sostenemi y Fundacion Respetami como esnan cu ta ehecuta e proyecto. Actualmente si no por tuma mas inscripcion ya cu e 20 klasnan cu ta participando ya ta den e fase di preparacion pa fecha final cu ta dia 18 di November proximo. E fecha aki ta dos dia adelanta di e Dia Internacional di Derecho di Mucha, pa motibo cu e aña aki ta cay riba un diadomingo.
Cada klas a wordo instrui pa scoge un derecho for di e 20nan cu ta aparece riba e poster di Fundacion Pa Nos Muchanan, ya cu esaki “ta e derechonan cu mas ta yega na e mucha di biaha,” segun Tecklenberg. E Tratado International di Derecho di Mucha mes ta consisti di 48 diferente derecho. Awo hunto cu nan meneer of juffrouw di scol, ta bay traha riba loke nan a scoge, sea pa medio di un cantica of un obra di man. Un cos cu ta e proyecto ta pidi ta pa henter e klas wordo envolvi. “Dus no ta asina cu si un mucha ta canta, ta e so ta canta, paso mescos cu aña pasa cu e premio ta pa full e klas.”