TRIPOLI, Libya- Al menos 63 migrante a wordo declara desapareci despues di cu nan boto a naufraga dilanti e costa di Libya. Esaki a wordo informa na AFP door di vocero di Marina Lybio, citando testimonio di personanan rescata.
Segun e general Ayub Kacem, 41 migrante a wordo rescata door cu nan tabata tin lifevest bisti. Nan a bisa cu den e boto tabata tin al menos 104 persona, cu cu esaki a zink dilanti e costa di Garabulli, na 50 km oost di Tripoli.
Ademas di e 41 personanan rescata, un barco di Warda Costa Libyo a drenta waf di Tripoli cu otro 235 migrante a bordo, incluyendo 54 mucha y muhe, rescata den otro dos operativo den e mesun zona.
Cu esaki, ya caba ta 170 migrante desapareci den Mediterraneo entre diabierna y diadomingo.
Diabierna a recupera curpa di tres baby un mas di shen persona a wordo declara desapareci den e naufragio di e embarcacion.
En total, 16 migrante, tur hende homber hoben, a wordo rescata.
Libya ta un pais cu miles di migrante Africano ta uza como transito pa Europa.
Hopi ta e personanan cu ta muri tur aña ora nan a purba crusa Mediterraneo, bou di condicionnan extremo.