Aruba College Fair Foundation ta un organisacion cu ya ta existi desde aña 2000 y ta percura pa brinda informacion y guia na studiantenan of na tur esunnan cu ta scohe pa bay studia den exterior na momento cu nan finalisa nan estudio aki na Aruba.
E tempo aya, Minister Mary Wever – Lacle a introduci e posibilidad pa esunnan cu ta den termina nan estudio por recuri na un feria di informacion, na unda no solamente nan ta haya e informacion di e scolnan cu nan lo por aplica pa sigui studia pero tambe tips valioso for di expertonan pa ta na altanto di kico ta spera nan na e momento cu e biaha pa su estudio of keda Aruba mes.
Loke a inicia como fuente di informacion awendia a crece den e dos dia di vital importancia den e bida di nos hobennan na unda den combersacionan personal cu expertonan Internacional of local, por yega na conoce e instituto cu ta brinda e estudio desea y hasta por scoge entre varios opcion y ta prepara asina pa e paso definitivo di su bida.
Renaissance Convention Center lo ta e luga di encuentro di informacion pa, te cu awo, 43 institutonan educacional y comercial.
Te awor aki 9 instituto di Europa, 15 di Centro y Noord America, 4 di Caribe, 9 di Aruba y 5 empresa local a inscribi pa ta parti di e evento aki. Esnan interesa por wak cua esakinan ta riba e website: arubacollegefair.com.
Tur esunnan cu lo kier bishita e College Fair, tanto alumno como acompañante, decanonan, etc., por registra pa mas tarda 5:59PM 31 di October, 2016 dor di yena e formulario di registracion na e link “Student Registration” riba e website ariba menciona y asina ricibi entrada gratis y parkeo gratis (den e areanan designa pa tal). Sin registracion, entrada ta Afl. 5.00 pa persona pa dia. Na momento di registra e persona ta haya un QR-code cu e por print cu ta su comprobante di entrada. Pa parkeo gratis, e mester print un di dos copia di e registracion caminda su number di auto ta visibel y pone esaki riba e dashboard den e auto corespondiente cu e number di auto.
Pa mas informacion bishita www.arubacollegefair.com , facebook page, Instagram y snapchat.