PENNSYLVANIA, Merca – Corte Supremo di Pennsylvania a publica un informe unda e ta duna detayes di rond di mil mucha indentifica como victima, pero nan por ta hopi mas.
Corte Supremo di estado di Pennsylvania, Merca diamars, 14 di augustus a duna un informe revelador riba abusonan sexual cometi riba tereno di misa catolico di e estado, caminda cu mas di 300 pastoor implica den e delito y a rond di mil mucha a wordo identifica como victima, segun USA Today a publica.
E resultado di e investigacion di mas di 1300 pagina a wordo divulga pa e fiscal general Josh Shapiro, cu a duna un conferencia pa splica e recopilacion di e investigacion. “E pastoornan tabata viola e muchanan, tanto mucha muhe como mucha homber. Y e hombernan di Dios cu tabata responsabel pa nan no solamente no a haci nada, nan a sconde tur cos”, e informe ta bisa. Ademas, ta di recorda cu hopi di e casonan aki a sosode varios decada atras.
Den e sentido aki, e corant ya menciona a comunica cu e lidernan local di e iglesia tabata conseha e victimanan pa no entrega denuncia di e abusonan, algun di nan a wordo cometi te cu 70 aña pasa. Den varios caso, e victimanan ta muri sin conoce husticia, ya cu nan no ta durf di conta di e sucedido of e acusadonan ta muri sin wordo castiga. “Como consecuencia, e tapamento, casi tur e casonan di abuso, cu nos a haya ta mucho bieuw pa bay huicio”, e documento ta expresa.
Di mes manera, e informe ta sigui bisa cu “ varios administrador di e diocesisnan, incluyendo e mesun obisponan, tabata desconseha e victimanan pa no entrega denuncia di e abusonan na polis. Nan tabata presiona e orden publico pa cancela of evita un investigacion of a hiba nan mesun investigacion deficiente y deshonesto, sin informa e crimennan contra e muchanan of e autoridadnan correspondiente”.
E investigacion mas completo di historia di Merca
Di otro banda, The Washington Post tambe a haya acceso na e informe y a destaca cu ta trata di e investigacion mas completo hamas realia na Merca tocante violacionnan cometi den Iglesia Catolico. E ta señala tambe cu esaki ta un trabao di 18 luna cu a abarca 8 diocesis di Pennsylvania. Aunke, e responsabilidad no ta limita no solamente na e estado Mericano aki.
En efecto, durante su anuncio, e fiscal e expreso cu tabata tin un “ tapamento sistematico den e misa di Pennsylvania, y Vaticano”. Pa realsia e dimension di e gravedad di e denuncianan, e introduccion di e reporte ta bisa: “Nos a cita y a revisa mei miyon pagina di documentonan interno di e diocesisnan. Nan ta contene pruebanan contra mas di 300 sacerdote pedofiel”.
E texto ta sigui bisa: “Mas di mil mucha a wordo identifica, segun e registronan di e misa mes. Nos ta kere cu e cantidad real di mucha kende nan registronan a perde of nan tin miedo cu e denuncianan ta di miles”. Luna pasa, papa Fransisco a acepta e renuncia di e cardinal Theodore McCarrick, di Washington, involucra den denuncianan di acoso sexual pa mas di 40 aña.