Siman pasa, McDonald’s a retira tur su saladanan for di e menu den 3 mil di su restaurantnan. Esaki ta bin despues di un serie di casonan di malesanan gastrointestinal.
E Centro pa Control y Prevencion di Malesa (CDC) y Administracion di Alimento y Medicamento (FDA) di Merca diahuebs a confirma cu 163 persona a bira malo despues di a come salada den e cadena di restaurant fast Food, Mc Donald’s den dies estado di Merca. Ademas, segun informenan, tres persona a wordo hospitalisa, pero no tabata tin victimanan mortal.
“FDA, CDC hunto cu autoridadnan local ta investigando e brote di ciclosporosis den varios estado probablemente relaciona cu e saladanan di e restaurantnan Mc Donald’s”, segun un comunicado riba e portal di Food & Drug Administration.
E parasito cyclospora ta wordo transmiti mediante e consumo di alimento of awa y ta causa di malesanan intestinal. E sintomanan, entre cual ta destaca diaree, por manifesta su mes despues di shete of mas dia despues di e aparicion di e parasito den e organismo, segun e Centro pa control y prevencion di malesanan di Merca. Otro sintomanan ta e perdida di apetito, gana di saca como tambe sacamento y cansancio. Tambe ta aparece sacamento, dolor di cabes y keintura.