Mester bin cu ley pa loke ta benta di productonan cu ta ser importa, pasobra si mira cuanto cos ta drentado Aruba y no sa ken ta bin cun’e e ta trece un problema pa e consumidor segun Marlon Sneek di AVP a splica.
E ta comenta cu tin cu bay Raad van Advies pa haya un conseho riba dje. Mester bisa cu a bin un conseho for di nan y a bay haci e ahustenan manera cu ta wordo proponi den e conseho aki. Segun Sneek, pronto lo keda cla cu esaki pa por entreg’e na Parlamento pa asina tur miembro por hay’e.
Por a tuma nota cu constantemente ta bin dilanti productonan cu ta yega Aruba pa bende y cu tin un of otro recall riba nan y hopi biaha esaki no ta tuma luga. E idea ta pa pone e ley aki den otro pa por atend’e cun’e. Entre otro a haya productonan hopi biaha cu fecha di vencimento of e barcode pa sa ta di unda e producto aki ta bin, ta wordo kita. Esaki ora cu ta cla cu e ley aki, esaki lo no ta bay ta posibel mas. Pasobra e mester por ta cu bo por trace bek ken a trece e producto Aruba, con e producto a yega y si tin problema cun’e, cu por atende esaki. Na e momentonan aki no tin’e den ley. Ta mir’e hopi caminda. Ta bay y pidi of bay cu e producto of buta e doño baha e producto for di shelf. Awor aki ta bay pone oficialmente den ley pa por atende cu e fenomeno aki, sigur ora cu mira e situacionnan cu ta pasa rond mundo. Entre otro e ultimo tabata den e caso di Brazil, unda cu tabata tin diferente producto, den e caso aki, carni y galiña cu tabata tin problema. Tin producto cu ta bin di Brazil pa Aruba. Ta importante pa tin e ley in place pa por atende cu nan. Ta hopi di e productonan aki constantemente ta den noticia y ta importante pa atende cun’e. Ta trahando riba e recomendacionnan pa asina pronto e ley ta oficialmente entrega pa tur miembro di Parlamento tin’e y pa por atende esaki na su turno, ora cu ta asina leu cu presidente dicidi di yama e reunion publico riba e ley aki.
Sneek a sigui relata cu por a tuma nota cu tin un bida nobo despues di a atende cu e ley den Parlamento pa loke ta inspectie. Por a lesa tambe den prensa cu via DRH, ta bezig cu reclutacion di trahadonan pa e departamento aki. Pronto lo bay tin e departamento aki full up to date, pa por bay atende, no solamente cu kehonan cu ta bay tin riba mal practica di un dokter, pero tambe pa atende cu e parti di higiena aki, cu hopi biaha ta mira aki aya tin un actividad conhunto ta tuma luga, drenta den diferente luga y cera e luganan pasobra nan no ta cumpli cu normanan di higiena. E idea lo bay bira pa ta esaki bira algo structural. Ta mirando cu dr. Schwengle ta haciendo locual cu e mester haci pa por tin un departamento cu por bay funciona optimalmente. E ta na e momentonan aki, cu no tur ora tin hende disponibel pa haci e controlnan aki y ta haya cu tin hende ta “get away’ cu nan.
Minister Schwengle tabata den staten pa atende cu e problematica aki y a duna indicacion cu lo bay tin hende extra ta bay bin pa por haci e trabaonan aki, pa por garantisa loke ta salubridad di comunidad, Sneek a splica.