Tur pensionado cu un entrada mas halto cu 1107 florin pa luna lo perde nan reparatietoeslag entrante prome di januari 2019. Esaki ta locual ta poni den ley cu Parlamento a ricibi diabierna ultimo y cu e coalicion MEP POR RED den Parlamento ta pushando pa pasa den ley diamars awor. E cambio aki a cay como un baño di awa friu pa e pensionadonan di nos Pais mirando cu netamente e Gabinete aki a bisa di lo kier yuda pensionadonan di nos Pais cu lo perde poder di compra cu e aumento di BBO y accijns riba gasolin cual lo ta un atraco riba e poder di compra di nos ciudadanonan. Pero pa Gabinete Wever Croes esaki no ta suficiente.
Tur pensionado cu tin un pension chikito banda di nan AOV, manera pensionadonan di Lago, enfermeronan cu a traha den hospital, y esunnan cu a traha den hotel lo perde e reparatietoeslag cu actualmente ta monta na 1200 florin pa aña. Aparentemente e coalicion di MEP POR RED lo kier financia e aumento di reparatietoeslag pa un otro grupo den nos comunidad cu e kitamento di un parti di e pensioen di miles di nos grandinan. AVP lo para firmemente contra e atraco aki riba e grupo vulnerabel aki di nos comunidad y fuera di diferente forma di purba para e intencion aki, lo entrega un cambio di ley diamars awor pa saca e abuso aki di e ley cu a drenta Parlamento diabierna ultimo.