Marisol Lopez- Tromp (POR): “Mocion pa investiga ex minister di Infrastructura ta pa trece claridad “

0

Durante tratamento di presupuesto 2018 di Pais Aruba den Parlamento, lider di Fraccion di POR, Marisol Lopez-Tromp cu sosten di e demas fraccionnan cu ta forma e coalicion a presenta un mocion pa bin cu un investigacion forensico riba tur e iregularidadnan cu a wordo cometi bou di e minister di Infrastructura di gobierno anterior. E mocion aki a wordo aproba y awor Gobierno mester bay ehecuta esaki.
E mocion ta bisa cu considerando e echo cu tin un cantidad di casonan dudoso, ilegal y/of fraudulento di tereno comercial bou di Gabinete Mike Eman I y II door di e Minister di Infrastructura y Integracion entre 2009 pa 2017; e echo cu dicho ex minister no tabatin un maneho ni tabata tene su mes na proceduranan di bon gobernacion pa loke ta e decisionnan cu e tabata tuma diariamente pa cu otorgamento di parcelanan den erfpacht; cu e ex minister di Infrastructura y Integracion tabata viola e ROP constantemente y tabata malinforma pueblo y a forma practicamente un grupo di persona rond di su persona como minister cu lo tabata yud’e regla tereno contra tur procedura sin consulta cu DIP; cu e minister di Infrastructura y Integracion di 2009 pa 2017 tabata cobra inversionistanan 5% di nan inversion di construccion di nan proyecto y tabata dicidi cuanto, unda y con e inversionista mester stort e placa contra nos ley di contabilidad; cu Gobierno actual a bin topa un situacion caotico den DIP caminda cu e ex minister di Infrastructura y Integracion no a percura pa tin un maneho di otorgamento di erfpacht y tabata firma pa loco sin pidi conseho di DIP y sin tene cuenta cu loke realmente tin dipsonibel na tereno pa otorga; cu na varios ocasion hues a bati ex minister Sevinger riba su dede debi cu e ta actuando contra ley como minister den su aprobacionnan di peticionnan pa construccion y cu e ta mishi y destabilisa nos estado di derecho y; cu tin hopi ciudadano a indica cu nan a paga pa haya tereno. Ta dicidi pa instrui Gobierno pa laga haci un investigacion (forensico) den DIP riba tur iregularidadnan den otorgamento di tereno pa cas y comercial durante gobernacion di ex minister di Infrastructura y Integracion; investiga e toewijzing di casnan na Seroe Colorado; investiga con ex minister Sevinger a malusa e clausula di maatschappelijke investering cual sumanan nunca lo mester a wordo gestort, pero mester a tuma luga den forma di material en natura y; entrega keho a base di e iregularidadnan cu a ser haya.
Marisol Lopez-Tromp a indica cu tin un cantidad di prueba cu a wordo treci dilanti no solamente e ultimo aƱanan, pero cu te ainda ta saliendo diferente prueba di e iregularidadnan cu a tuma luga. El a agrega cu minister di Infrastructura actual a trece varios di esakinan den Parlamento, cu ta encera no solamente documentonan, pero tambe otorgamento di tereno den areanan cu no mester a tuma luga, pagonan cu no mester a tuma luga, etc.
Mas aleu e ta bisa cu den diferente reunion e tema aki a bin dilanti y ciudadadonan a bin dilanti tambe cu hopi preocupacion bisando cu nan mester a paga pa cierto tramitenan tuma luga, cual no mester tabata e caso. Ta trata di casonan grave cu ta contra ley di contabilidad y no ta aceptabel ademas cu no lo kier pa nan pasa nunca mas.
Awor tin un Gobierno cu ta para pa integridad, cu ta para pa un maneho transparente y pa por pone tur loke a sosode tras di lomba a pidi pa e investigacion profundo riba loke a ser haya caba y loke seguramente lo bay wordo haya. Intencion ta pa trece claridad pa pueblo y pa conscientisa nos comunidad di actonan coruptivo cu a tuma luga, como tambe pa nan ta consciente di kico ta e proceduranan corecto pa loke ta por ehempel, otorgamento di tereno of proceduranan den gobernacion.

Comments

comments