Mescos cu Parlamentario Andin Bikker, Parlamentario Independiente Marisol Lopez-Tromp, a bay Su Excelencia Gobernador, Fredis Refunjol, pa asina mustra cu Gobierno no ta transparente pa loke ta e documentonan di e ley di Citgo.
El a splica cu a bay Gobernador despues cu a reuni ayera, presidente di Parlamento, tur e lidernan di fraccion y tambe e, como parlamentario independiente, a vocifera cu no ta di acuerdo cu e hecho cu no por haya e documentonan cu ta forma parti di e ley, di e apoderacion aki, pa haci Gobierno pa por haci cierto acuerdonan, den nomber di nos pais. Ki mishi cu Parlamentarionan tin cu bay sinta den un biblioteca, caminda cu tin dos coordinador di Gobierno, ta sinta eyden pa supervisa con ta wak e documentonan, si ta saca potret, of si kier copi’e. Mientras cu e leynan aki no por ta confidencial, si den un reunion publico dialuna, tin cu bay discuti riba nan abiertamente y e leynan aki ta mara nos pais y nos yiunan y nos futuro, pa por lo menos 10 aña. Un chens cu hasta e por bay pa 20 of 25 aña. E tempo ey ni e ministernan aki no lo ta sinta den nan stoel mas. Ta mas cu logico, cu e parlamentarionan tin tur derecho di wak e documentonan aki, sin secrecia y e carta di Minister de Meza, loke ta bisa ta, cu e no ta confia pasobra Raad van Advies, si por a lesanan na nan antoho, pero e Parlamentarionan tin cu haya supervision pa les’e. Ta Parlamentarionan ta supervisa e ministernan. Esey ta nifica cu ya caba den corto tempo, ta bisa cu ta compronde cu e ta di urgencia pa Gobierno, pero no por ta asina si cu ta wordo obstrui of impedi den nan trabao pa tin un transparencia pa les’e trankil, studi’e trankil y pa por haci preguntanan y yega na vota. Con bo ta bay vota riba algo cu ta wanta duro cu di baina bo por wak e paginanan. E no ta logico, ni pa aña 2017 pa haci.
E punto no ta cu e documentonan ta full habri, e punto ta cu pa hay’e pa studi’e, wak’e y haci pregunta liber riba dje. Awo ni pregunta por haci drechi, pasobra tin dos hende cu wowo di shoco ta wak e documento, si ta saca un potret of no ta saca un potret, etc. Parlamento ta e organo di mas halto y Gobierno ta mara nos pais na acuerdonan cu ta costa placa, mañan si algo bay bon, si algo bay robes, ta nan a firme.
Lopez-Tromp a splica cu mester por wak e documentonan, trat’e, studi’e, manera adulto. E ta haya cu minister y Gobierno mester trata Parlamento y dun’e respet cu e mester tin. E Presidente di Parlamento mester para pa esey tambe, el a bisa por ultimo.