Cu gran atencion di prensa y invitadonan elite Hulandes, e conocido cantante Marco Borsato a inaugura su prome exposicion fotografico hunto cu e fotografo Hulandes renombra, Raymond Rutting. E exposicion aki a wordo inaugura na 5&33 Gallery na e luhoso Art’otel na Amsterdam, Hulanda. E dos fotografonan a bishita nos dushi isla na februari ultimo na unda Rutting a duna e cantante popular Marco Borsato un ‘Photography Masterclass’.
For di nos paradanan extravagante di carnaval, te cu momumentonan historico y tambe di nos paisahenan natural te cu sessionnan di moda riba playanan, flora y fauna, casi tur disciplina fotografico a wordo cubri. Cu esaki Aruba ta ricibi cobertura den un forma artistico di su rikesanan den e mercado Hulandes y Europeo.
Durante otoño di 2016, Marco Borsato a participa den un competencia fotografico ‘Het Perfecte Plaatje’ cu a wordo transmiti riba RTL4. Tabata hustamente eynan cu e por a expone y comparti su pasion pa cu fotografia. Cu un serie fotografico yena cu color y briyo, Borsato a haci su prome debut como exhibicionista den un duo exposicion cu Rutting, esta ‘Faces of Aruba’ cu lo ta wordo exhibi te cu dia 27 di augustus 2017.
Esaki ta un di e tantisimo biahanan cu e proyecto fotografico aki a captura atencion di medionan Hulandes y Europeo, un mercado turistico den desaroyo positivo pa producto Aruba.
Aruba Tourism Authority ta sumanente orguyoso di por a participa pa medio di guia y facilitacion durante e curso fotografico di Marco Borsato y Raymond Ruttig na Aruba. E resultado esaki ta un promocion sincero y organico cu ta realsa Aruba su nomber den nivelnan nobo, promoviendo nos destinacion den e mercado Hulandes/Europeo.