Ex Minister Otmar Oduber a tuma nota cu e presupuesto di loke tabata su carteranan, no solo a wordo aproba y elogia den Parlamento siman pasa durante tratamento di presupuesto 2017, pero tambe cu a laga esaki intacto.
Esaki ta algo cu ta yena e ex mandatario di orguyo y ta un muestra bibo cu e maneho cu el a hiba durante tur e añanan cu el a ocupa e posicion di minister tabata uno positivo y exitoso.
Durante e reunion den Parlamento, tanto e Minister di Turismo, Transporte, Sector Primario y Cultura interino, como tambe Prome Minister a presenta tur e dato y cifranan al caso y a defende e maneho y presupuesto laga atras pa ex minister Oduber na un bon forma y hasta a elogia e trabou haci.Tambe miembronan di Parlamento cu a hiba palabra a elogia diferente di e proyectonan realisa, den proceso di realisacion of cu ta bay inicia, laga atras pa Sr. Oduber.
E ex mandatario ta aprecia cu e trabou duro cu a wordo haci no solamente pe, pero pa henter un team a wordo aproba y elogia y ta spera cu e maneho aki lo por continua bou di e ministernan cu ta tumando su carteranan over den e dianan cu ta bin.
Sr, Oduber a expresa cu e trabou cu el a haci como minister pa 7 aña largo el a hacie cu hopi dedicacion, amor y cu e vision pa hiba Aruba na e nivelnan di mas halto y specificamente den e area di turismo, pa mantene nos isla dos stap dilanti di nos competidornan.
Dunando un splicacion riba e desaroyo di e carteranan cu e tabatin bou su encargo Otmar Oduber a bisa cu durante e prome 4 añanan e tabatin e responsabilidad di Labor y a cambia leynan pa defende derecho di trahadornan na Aruba.
Sector Primario ta un exito rotundo, tur esnan cu ta traha na Santa Rosa ta brasa y carga sector primario, a bin cu tax holiday riba sector primario cu a conduci na un generacion nobo di agricultornan, criadornan y piscadornan. Piernan a haya atencion rond Aruba, mientras cu el a laga atras un cantidad den construccion y reconstruccion.
Cultura a haya un bida, a haya su lugar no solamente na San Nicolas, pero rond Aruba. Awe por wak cu mayoria di su ex coleganan ta hinca cultura den nan maneho.
Transporte Publico, un Departamento di Aviacion cu pa añanan no por tabatin un radar. Awe tin un ANSA NV cu ta un compania cu ta genera fondo y lo tin su radar otro aña despues di casi 27 aña.
Directie Scheepvaart cu tabata costa pueblo 3 miyon Florin ta genera mas di esaki a base di e leynan cu ex Minister Oduber a cambia.
Ora el a asumi e posicion di minister, turismo tabata den un deterioro, un desaster y Departamento di Turismo tabata costa nos pueblo 37 miyon pa aña. Awe tin un instituto ATA cu tin un presupuesto di mas di 100 miyon Florin cu no ta sali di pueblo di Aruba. Tambe awe e tin un fondo reserva di 19 miyon Florin y tur aña ta entrega Gobierno alrededor di 10 miyon Florin. Esey ta e ATA cu ex Minister Otmar Oduber a laga atras. “No tin duda cu e trabou den team cu nos a haci a hiba nos turismo na e nivelnan di mas halto. Otro aña lo ricibi un cantidad di 750 mil bishitante crucero y turismo stay over ta creciendo den tur Mercado”.
Otmar Oduber a finalisa bisando cu e ta gradici pueblo pa dune e confiansa pa realisa e trabou cu el a laga atras pa comunidad di Aruba. “Mi tin e speransa cu e mesun trabou lo continua tambe door di esunnan cu lo tuma over”!