Diabierna dia 5 di Mei, pa 8 or y 25 di mainta, Centrale Post ta dirigi un patruya pa Rosario College unda cu un señora kier a bringa cu’n mucha di scol. Na e sitio, e agentenan policial ta papia cu e señora R.R. kende ta declara cu e tabata sinta den auto, na momento cu e ta wak con su yiu muhe ta cuminsa yora, ora cu e ta wordo acerca door di un grupo di mucha muhe. E señora su yiu a tene su cabes y a cuminsa grita. Esaki a pone cu ela baha for di auto, y a core bay cerca su yiu. Door cu el a drenta den panico, el a cuminsa grita e otro muchanan. Despues e docentenan a yega cerca y R a admiti cu enberdad, den su momento di panico el a insulta e docentenan. R. a sigui declara cu su yiu muhe ta wordo gebully door di un otro alumno, F. e problema aki tin un tempo caba asiuna y R a ripara cu scol no ta haci mucho al respecto, ni tampoco S.K.O.A. Segun R., su yiu ta wordo menasa door di F., pa cual motibo e no kier papia cu su mayornan tocante e asunto aki. Siguientemente, e agentenan policial a papia cu e Director Suplente kende a declara cu e no ta na altura di dicho problema y cu e lo acerca e trahado social di S.K.O.A. y conhuntamente cu e mayornan di ambos alumno y tambe e docentenan lo sinta hunto pa yega na un solucion pa e problema. Despues agentenan a papia cu e wela di e alumno F., mirando cu mayornan di e alumno en cuestion ta biba den exterior, y esaki a declara cu dos dia prome el a wordo acerca door di R. pa e papia cu su nieta F., ya cu esaki ta bully R. su yiu. Segun O., esakinan ta cosnan di mucha y cu e no a presta mucho antencion na esaki. Tambe e agentenan a papia cu e personanan envolvi, menos e dos alumnonan, pa asina yega na afspraaknan concreto hunto cu e trahado social di e scol pa asina yega na e centro di e problema y tambe ambos mayornan lo papia individualmente cu nan yiunan pa asina saca afo kico ta e problema. Bullying ta algo hopi serio y esaki tanto den exterior, como na Aruba ta un problema hopi grandi entre muchanan di scol. Agentenan a keda di tuma contacto cu Slachtofferhulp pa asina esaki tuma contacto cu e mayornan di R. y tambe tuma contacto cu e instancianan concerni pa asina yuda R. na e miho manera posibel.
Centrale Post a wordo poni na altura di esaki.