Despues di e ultimo resultado den corte dia di ayera despues di 3 aña cu e accidente a sucede. Henter famia a keda sorprendi ora cu abogado di Vriend, mr. Chris Lejuez a papia cu casi e tira tur e culpa di e accident riba e mucha Zina. Sra. Michella Sue-Ann Croes cu e declaracion.
Famia a keda sorprendi cu e castigo cu OM a pidi pa Vriend. Ta parce cu como Sra. Vriend no tin culpa riba e accidente cu a costa e bida di su yiu muhe. Zina no t’ey y no por papia pa defende su mes, pero tin rapportnan cu ta contradeci tur locual abogado aki bisa den su pleidooi.
Asina tanto fout a wordo cometi caminda cu a haya e sorpresa den corte, siendo cu semper a pidi un tegen onderzoek, anto a tende cu e bloedblognan tabata caduca. Pero a resulta cu no ta asina, cu tabata vigente. Esaki kiermen cu un hende a perhudica e caso completamente.
Awor akinan dia 5 di Juli ta bay keda warda pa wak kico ta bay sali den e caso caminda cu a sinta mas cu 3 ora den corte. Hues ta haya cu tin hopi aspectonan pa tuma na cuenta, y ta hopi dificil pa haya sa ki decision ta bay wordo tuma. Pero como mama e ta hopi contento cu a pesar di todo por a yega asina leu cu e lucha e caso di e mucha Zina.
E caso aki no por ripiti anto p’esey Sra. Michella Sue-ann Croes ta keda lucha y kier transmiti e mensahe cu Zinna tabata gusta den un cantica di Pitch Perfect, caminda cu no ta cuenta di placa sino cu casonan asina cu inhusticia riba e muchanan no por tuma luga y otro famia no lo por sufri esaki mas.
Si lo bay apela e sentencia di hues, famia no a papia ainda cu nan abogado tocante esaki. Nan ta spera dia 5 juli ariba e decision di hues. Loke sali afo, nan como famia lo mester siña biba cun’e. Pero den e declaracionnan cosnan a wordo cambia. Ta invita un hende pa core den e bisindario ey y wak si ta corecto na 80 km. Tin asina tanto fout cu a wordo haci pa cu e investigacion den caso di Zinna.
Pa ultimo Mama di Zina a bisa cu e no ta abogado y ta laga tur cos den man di ley. Locual cu a pasa cu su yiu y mescos cu e caso di e dos angelitonan di San Nicolas, e casonan aki no por bolbe pasa. Si e ta pidi pa tur hende ta consciente riba caminda, pa no wak telefon.
E chauffeur mester ta atento ariba caminda, manera wak un bala riba caminda por tin un mucha cu ta bin su tras of hasta un cacho. Den tur bario mester tene na cuenta tur esaki siendo cu mucha ta keda mucha. Mester tene na cuenta cu no ta importa con hopi auto tin na Aruba sino cu si un hende tin rijbewijs, e tin cu haci uzo corecto di dje y ta mas consciente riba caminda, segun Sra. Michella Croes, mama di e victima, Zinna a finalisa bisando.