Mal tempo ta wordo proyecta pa pasa cerca diamars laat

0

Mark Oduber, director di Meteo Aruba tabata den sala di prensa, caminda cu un conferencia a wordo yama referente na un desaroyo di tempo cu ta tumando luga.
El a splica cu tabata un ola tropical cu tabata tin di cerca basta dia caba. A saca e boletinnan di informacion desde diasabra, indicando cu tin un ola tropical fuerte zuidoost di Trinidad cu por desaroya y cu mester a sigui boletinnan di meteo un tiki di cerca, pa mira si tin cambio den desaroyo.
Diadomingo Hurricane Center, mirando e situacion di e ola tropical aki, a indica cu segun e modelo atmosferico ta grandi cu e por desaroya. E ora a bay di loke ta wordo considera como Potential Tropical Cyclone nr. 2 Advisory. Esey ta djis pa yuda e paisnan parti zuidoost di Caribe, pa nan por saca avisonan delanta di Tropical Storm Watch of Tropical Storm Warning.
Oduber ta sigui splica cu e desaroyo aki ta proyecta pa pasa cerca di e Islanan ABC parti diamars laat pa diaranson marduga, cu e por pasa den nos vecindario y ta haci e area humedo y instabil. Proyeccion di biento ta keda tiki panort di nos. Motibo ta cu e ta perde forsa y ta anticipa cu den marduga di diaranson, e ta net net panort di nos.
Motibo ta cu e sistema ta debilita. Si wak e parti central di Caribe tin disturbio den bovenlucht y esey ta crea condicionnan no faborabel pa ciclonnan tropical desaroya.
Unda e ta actualmente ta un area faborabel. Una bes e pasa Trinidad, e ta bay drenta den un area poco faborabel door di e disturbio di e nivel mas halto den atmosfera. Esey por bin cu cambio y por pone fluctua den forsa. E por debilita, pero semper mester ta cauteloso den sistemanan tropical. Por corda riba Matthew tambe, indicacionnan tabata cu e lo debilita, pero toch el a hala panort di Aruba, para haya forsa. No ta kere cu lo pasa cu esaki, pero mester siguiā€™e tiki di cerca.
Bayendo riba e modelo atmosferico, pa haya un miho idea con e ciclon lo move, por mira cu e ta drenta e parti zuidoost central di Caribe, core pasa cerca di e islanan ABC. Manera cu e pasa e islanan, e ta perde forsa y Aruba ta esun di mas west di islanan.
Mirando e situacion eynan, e scenario di Meteo ta cu e parti di impacto cu diamars laat pa diaranson por haya un cantidad di awasero entre 15 pa 25 milimeter. Por ta localmente algun luga por haya un tiki mas y e biento lo keda den direccionnan por lo general oost, pero e por varia bira zuidoost tambe. Un forsa di 10 pa 20 nudo, maximo 30 te 35 nudo cu rafaga. Y pa condicionnan di lama, ta anticipa cu e lama, vooral parti Noord lo bira brabo di 5 pa 10 pia.
Te ainda e proyeccion ta, unda cu e hotelnan ta sinta, no lo bira bruto. Manera cu e sistema ta drenta e por ta debilitando. Door cu e sistema aki ta un sistema fastioso cu ainda no ta bon forma, awe tardi e avionnan di Hurricante Center lo bula aden pa wak.
Ora e drenta Caribe lo por debilita, y esey ta haci cu e pronosticonan ta bira tiki fastioso. Awe tardi ainda lo mira e ultimo modelonan pa wak si por saca un Marine Advisory y un Wind Advisory pa Aruba. Pero te ainda e proteccion lama noordkant lo bira hopi bruto. Biento por supla un tiki, pero rato rato cu awasero, por ta core entre 15 pa 25 milimeter. Maximo por ta localmente algun caminda un tiki mas.