Den e ultimo dianan, pa no bisa luna of añanan, tin un discusion cu ta andando rond mundo si e serbete sanitario, den boca di pueblo yama Kotex, ta wordo considera como un obheto di luho. Shonnan, e maandverband mester wordo considera como un derecho humano. Nos hende muhenan no tin’e facil.
Ki ora tabata e ultimo biaha cu bo a bay den un baño publico, na scol of na trabao, cuanto mester a paga pa uza e papel di wc cu abo ta uza? E contesta ta nada.
E ta algo necesario cu tur baño mester tin, pasobra e ta necesario pa tene bo mes limpi despues di haci bo necesidadnan. Wel, e ta conta tambe pa e serbete sanitario of kotex.
Nunca lo bo biba pensa cu rond di bo bo tin un rol di papel di wc di spare si en caso cu papel mester caba cubo mientras cu bo ta bezig ta haciendo bo necesidadnan pafo di cas, berdad?
Pa rasonnan sanitario, nos como sociedad a dicidi pa encurasha hende pa haci nos atras limpi. Pa rasonnan sexista, nos no por afford e mesun consideracion na mucha muhe y hende muhenan cu no kier sangra door di nan paña or riba muebles of enfrenta factornan di salud door di no percura apropiadamente pa nan menstruacion.
Esey ta cambiando. Despues di añanan di sinti berguensa di funcionnan normal di curpa, mas hende muhe ta papiando riba e menstruacion y e necesidad pa sociedad trata e productonan femenino como un necesidad hopi basico.
“Tampon of maandverband mester wordo trata mesun cos cu papel di wc. Nan ta sirbi e mesun proposito – articulonan cu ta yuda nos cada dia, funcionnan normal di curpa,” segun Nancy Kramer a conta Huffington Post den un email recientemente. Kramer ta e muhe tras di e campaña “Free the Tampons”, cu el a cuminsa na Ohio pa asina pone tampon y maandverband por nada den tur baño publico.
“Si hende homber tabata tin menstruacion, nos no lo tabata tin e combersacion aki,” el a bisa. Di acuerdo cu investigacion di Kramer, e costo ta mas of menos $4,67 pa cada studiante of empleado femenino pa por provee productonan sanitario anual. “Den otro palabra, pa mas cu un kopi di koffie luhoso, bo por abastece un hende muhe cu producto pa un aña,” el a bisa.
86 porciento di casi 800 persona kende a tuma un encuestia incientifico riba Twitter, a bay di acuerdo cu tampon of maandverband mester ta por nada.
Mientras otronan ta pens dos biaha riba e costo pa stock un baño cu papel di wc y habon y papel pa seca man, productonan femenino ta wordo considera como un luho. Nos ta bibando den un mundo di Tampon of Maandverband.
Esey ta un stress y costo agrega na e bida di un hende muhe cu hende homber simplemente nunca lo mester experencia. Hende muhe mester lucha pa ta sigur cu nan ta cubri. Algun di na ta uza un simpel tampon of un maandverband demasiado largo, pasobra nan no tin extra of no por cumpra uno, debi na dificultadnan medico. Otronan ta coy un cantidad di papel di wc y ta lora rond di e kiel di e panty. Hopi hende muhe riba onderstand, no por afford pa cumpra e productonan aki. Pa hende muhenan ambulante, esta sin cas, pa tin nan menstruacion, e ta hopi mas estresante.
Na scolnan publico, tampon y maandverband ta scondi den oficina di e director of den koffiekamer. Muchanan adolescente ya caba ta pasa hopi trabao pa deal cun’e pa asina no yama atencion sin cu nan kier ora di tin un maandverband den nan man. Manera, gaña pone den saco di carson of den tas, despues pa bay baño y aplik’e.
Leynan di estado di Merca por ehempel, traha pa legisladornan, kende mayoria parti ta hende homber, no ta pensa riba menstruacion, no ta inclui riba productonan sanitario riba un lista di productonan medico y ta ricibi impuesto di benta y di luho. Den otro paisnan, manera India, Australia y hasta paisnan den Europa, tampon of maandverbandnan ta haya un impuesto di 18 porciento y ta wordo considera como un producto di luho.
Muchanan actualmente ta keda sin bay scol debi na nan menstruacion y si nan ta den klas mes, nan ta un tiki mas ansioso y estresa riba nan situacion. Nan no ta concentra bon.
Si nos wak den nos mesun cura di cas, Aruba, den un supermercado comun y coriente pa un paki di maandverband por core den careda di 5 florin, anto esey ta pa e padsnan regular, fini, cu no ta tuma demasiado fluido. Awo si nos mester coy esun cu ta pa e temporada di mas pisa, of anochi, esey ta costa dos pa tres biaha e prijs, cual pa algun hende, ta impagabel. Riba dje, nos tin cu paga e BAZV y e BBO, cual ta subi e prijs un tiki mas.
Si nos wak un tiki mas leu, na Israel, bañonan publico tin papel di wc, habon, papel di seca man y maadnverband POR NADA, cual ta facilita, no solamente bida di e usuario, pero en particular di e hende muhe, cu ta pasando den e periodo di mas dificil di su luna.
Pa nos por conclui, e maandverband, tampon, of den boca di pueblo, Kotex, no ta un luho en lo absoluto, sino e ta un necesidad cu mester bay riba e lista di e canasta basico medico.