Roma, ITALIA- Luto den mundo di ciclismo: Michele Scarponi ta muri ora cu un truck a dal’e ora cu e tabata train pa e Giro di Italia.
E ciclista Italiano Michele Scarponi, ganado di e Giro di Italia 2011 fayece diasabra mainta na edad di 37 aña despues di cu un truck a pasa dal’e, na momento cu e tabata train ariba su bicicleta.
Scarponi, di 37 aña, tabata preparando su mes pa e Giro cualo lo cuminsa dia 5 di Mei na Cerdeña. Pa motibo di e ausencia di Fabio Aru, Scarponi lo mester a eherce e liderasgo di e ekipo Astana den e prueba aki.
Profesional desde 2002 y tata di un paar di morochi, Scarponi a destaca pa su cualidadnan di escalador y a conkista e ronda Italiano na 2011 despues di e descualificacion di e Spaño Alberto Contador door di doping.
“Mi a freeze y a keda sin palabra ora cu mi a ricibi e noticia di e accidente di Scarponi, gran persona y semper cu un sonrisa ariba su cara. Descansa na paz mi amigo:, Contador a scirbi ariba su cuenta di Twitter.
Scarponi mes a wordo suspendi door di doping na 2007 y 2008 den e caso Puerto.