E entrenador di futbol Louis van Gaal, cu tabata dirigi Ajax, Barcelona, Bayern Munich, Manchester United y tambe e seleccion Hulandes, a anunia cu e ta retira pa motibonan familiar. Esaki despues di e fayecimento di un yerno y un ruman muhe di dje.
Van Gaal tabata tecnico di Manchester United entre 2014 y 2016. Esaki tabata su ultimo ekipo. E no a traha mas desde cu el a retira for di e Club Ingles y awo cu su 65 aña e ta dicidi di stop completamente cu futbol.
Segun publicacionnan den e corant Hulandes, De Telegraaf, Van Gaal a splica cu e acontecimentonan den su famia a afecta su persona hopi y esaki a pisa hopi den su decision.
E technico Hulandes a reconoce cu despues di a bandona Manchester United, el a tuma un aña sabatico unda cu el a ricibi varios oferta pa bay traha na China y na Paisnan Arabe, pero el a dicidi di rechasa esakinan.
E entrenador Hulandes a splica cu su intencion tabata di retira despues di a dirigi e seleccion Hulandes (2012- 2014) na final di mundial di Brasil. “Pero despues a bin e oportunidad di Inglatera y esaki ta un pais excelente pa coach, y cu awo esaki tambe ta den su CV”, el a agrega. Cu e “Redsnan”, e coach Hulandes a titula campeon di e FA Cup, despues di a pasa un temporada cu su cabes riba e guillotina, debi na falta di resultadonan convincente.
Van Gaal a dirigi Bayern Múnich (2009-2011), AZ Alkmaar (2005-2009), Barcelona (2002-2003), Seleccion Hulandes (2000-2001), Barcelona (1997-2000) y Ajax (1991-1997).
Den su ekiponan el a dirigi futbolistanan manera Rivaldo, Luis Figo, Pep Guardiola, Arjen Robben, Thomas Müller, Franck Ribéry, David de Gea, Juan Mata, Ángel Di María, Radamel Falcao, Wayne Rooney, Frank Rijkaard y Patrick Kluivert.