Stichting Fundacion Facilidadnan Deportivo a haya un director nobo den sr. ing. Junior Tromp. Dialuna ultimo tabata e prome dia di trabou di ing. Tromp y den presencia di director adhunto di FFD, sr. Hugo Mohammed y Presidente St. FLPD y alabez Tesorero di St. FFD, sr. Di Stefano Wernet RA mesora a cuminsa labora unda a haci un recorido y inspecciona e trabounan di renobacion cu pronto lo inicia na e Centro Deportivo Frans Figaroa na Noord.
Mester bisa cu e renobacion na e compleho deportivo na Noord lo bay ta uno grandi unda cu 4 poste di luz so lo bay keda den funcion mientras e dos nan mei mei lo wordo kita. Tambe e daknan di ambos tribuna lo wordo cambia y lo bin un scoreboard completamente nobo y moderno. Prome fase lo start pronto unda lo cuminsa traha riba e banda drechi di e stadion. Lo traha tambe riba e tralie nan cu a bini for di e tereno di futbol na Yara mientras lo construi un muraya chikito pa pone e tralie nan.
Ta bon pa menciona pa e anja aki tin mas projectonan di renobacion, entre otro na e Compleho Deportivo Guillermo P. Trinidad.
Den e dianan siguiente lo haci un bishita di trabou na facilidadnan deportivo di Jaburibari como tambe e tereno di futbol na Yara, ambos ta cay bou maneho di F.F.D. Na banda di Canadian Bank Note Limited, Canadian Bank Nota Aruba Nv, CMB, TeleAruba, Sportsubsidiecommissie, Land Aruba, Minister van Sport, e St. Fundacion Facilidadnan Deportivo tambe ta un socio importante y strategico den e cadena di deporte pa St. Fundacion Lotto Pa Deporte. Ta pesey tambe union ta hasi forsa.
Lotto kier a desea sr. ing. Junior Tromp tur clase di exito den su funcion nobo como director di St. Fundacion Facilidadnan Deportivo.