Diasabra anochi den e ballroom di Aruba Marriot Hotel &Stellaris Casino, Ministerio di Deporte hunto cu su stakeholdersnan a tene e di 15 edicion di e prestigioso evento di gala, Premio Excelencia den Deporte. Pa di 15 aña a honra nos atletanan cu a destaca den e aña deportivo cu a transcuri. Den un sala completamente yena cu atletanan y nan famia, dirigentenan como tambe invitadonan di honor a hasi entrega di e premionan maximo na esnan cu a sobresali den e aña deportivo 2017. Premio Excelencia den Deporte ta sirbi como un muestra di gratitud, reconocimento, y estimulo na esnan cu a destaca den mundo di deporte.
Lotto, e loteria di Aruba pa medio di Stichting Sportsubsidie Aruba ta subsidia mayoria di nos actividadnan deportivo den cual nos federacionnan y nan atletanan ta envolvi, esaki na nivel local y internacional. Lotto y St. Sportsubsidie Aruba ta masha orguyoso di cada un di e atletanan cu a wordo nomina na e anochi aki, tur atleta nomina ta un ganador e anochi aki.
Pa e motibo aki tambe Lotto y Stichting Sportsubsidie Aruba kier a felicita tur atleta cu a wordo nomina den e Premio Excelencia den Deporte, tur merece di a wordo honra den un anochi cu a wordo dedica specialmente na nan. Un pabien super special ta bay na e dos atletanan femenino Thashaina Seraus y Linda Smith kendenan a sali e atletanan di aña 2017, dos berdadero modelonan ehemplar pa otro hobennan. Esaki sin duda ta un otro muestra cu nos hende muhernan ta destaca den tur forma. Un pabien na e organisadornan di e evento, na e comision di huradonan cu tabata tin e tarea dificil di scoge e ganadonan na e anochi aki.