For di ora cu a anuncia cu e Feria Betico Croes 2018 lo wordo teni riba e tereno patras di Centro Deportivo Betico Croes tur amante di e deporte di cabay tabata ansioso pa mira ta con e pista y henter e area lo keda pa dicho competencia. Mester bisa cu desde e prome dia caba tur hende tabata satisfactorio y positivo riba e forma con tur cos a wordo hinca den otro. Comentarionan tabata bon sigur mirando cu e tabata uno completamente diferente cu un rancho cual tur hende ta custuma cune caba. Pues tanto pa e cabay como e amazona y jinetenan e tabata algo nobo. Mas cu claro hende ta gusta ta den nan zona comfortabel pero tin biaha ta bon pa purba algo diferente.
Pa loke ta e resultado di e Feria Betico Croes mester bisa cu den Youth Horsemanship, e prome lugar a bay pa Marley Ras y e di dos lugar a keda Fenne Nauta. Den Amazonas Principiante 12-14, e prome lugar a bay pa Nayzah Pina mientras den Amazonas 9-11, como e mihor a keda Alani Nicholson y prome Courtney Irausquin. Den Jinete 9-11, a keda mihor: Mathijs Peet. Den e categoria Amazonas 12-14, como e miho nos a haya Ashley Weijers, Prome a keda Genesis Pietersz, Segundo: Gabriella Piazzi, Tercer: Alina Kock y Cuarto: Ivana Weijers. Den e categoria Amazonas 15-17, nos a haya como e Mihor: Melanie Wever, Prome: Zoey Arends, Segundo: Elizabeth Johnson y Tercer: Aaliyah Acosta. Den Jinetes 15-17 como e Miho: Errion Kock. Pa loke ta Amazonas 18-20, como e Miho: Noelani Figaroa, Prome: Leeza Figaroa y Segundo: Eva Pols. Den e categoria Jinetes 18-20, como e Miho: Willem Werleman, Prome: Gianluca Curiel y Segundo: Dwayne Chirino. Den e Jinetes 21-24 como e Miho: Jordy Wever.
Un danki sigur na Lotto, e Loteria di Aruba pa medio di Stichting Sportsubsidie Aruba cu a subsidia e eventonan deportivo denconexion cu e celebracion riba Dia di Betico. Tur aña mayoria federacion tin riba nan calendario un evento deportivo riba 25 di januari, celebrando asina e fecha natal di e gran estadistica Arubano.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.