Ya pa varios aña e federacion di hisamento di peso esta Aruba Amateur Weightlifting Association ta organisa nan prome actividad di aña riba nan calendario y hustamente ta haci esaki riba Dia di Betico cu ta 25 di Januari. Esaki ya a bira un tradicion unda un cantidad grandi di atleta ta bin hunto pa competi y alabes celebra e fecha natal di e gran estadista Arubano. Pa hopi aña e acomodacion di Centro Deportivo Frans Figaroa na Noord ta e cas di e deporte di pesas na Aruba. E biaha aki por a mira atletanan di Muscles and Lungs Crossfit y TNT Gym.
Mester bisa cu cada bes recordnan bieu ta wordo kibra, e mayoria di hopi añanan atras mientras esnan cu ta establece esakinan, e mayoria ta muchanan hoben cu no tin mucho aña den e deporte pero si tin hopi talento pa yega hopi leu den futuro cu e deporte aki. Tres di e cuater recordnan nacional a keda estableci pa un dama den persona di Nicole Dijkhoff cu a kibra un total di 3 record nacional den categoria youth 69kg cu tabata na nomber di Yasuris Lejuez, cu solamente 14 aña. E honencita Nicole Dijkhoff a kibra record nacional den Snatch 48 kg, Clean & Jerk 54, y e total di 102 kg. E otro record nacional tambe ta un femenino den categoria senior di 48kg unda e hoben Jesurine Croes den su hisada ta logra den Snatch 31 kg cu tabata riba su propio nomber. Ganador absoluto den division di damas ta atleta di Selecion Nacional Jennifer Piter cu a bay cu titulo maximo cu un total di 152 kg. Ganado absoluto den division masculino ta atleta tambe di seleccion Nacional ta Joel Kuiperi cu a bay cu e titulo maximo cu un total di 275 kg. E siguiente competencia lo tuma luga 18 di Maart celebrando Himno y Bandera.
Un danki sigur na Lotto, e Loteria di Aruba pa medio di Comision di Subsidio cu a subsidia e eventonan deportivo en conexion cu e celebracion riba Dia di Betico. Tur aña mayoria federacion tin riba nan calendario un evento deportivo riba 25 di Januari, celebrando asina e fecha natal di e gran estadistica Arubano.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.